Múte: Ileqquusumik ataatsimeersuarneq IA-p politikkianik nukittorsaassaaq
Inuit Ataqatigiit Qaqortumi 6.-8. august ileqquusumik ataatsimeersuartussanngorpoq. Ataatsimeersuarnermi partiip politikkikkut anguniagassai oqaluuserineqassapput. Siulittaasup ataatsimeersuarneq pitsaasumik ingerlassasoq naatsorsuutigaa, naalakkersuinikkullu sulinerup suli nukittorsarneqarnissaanik naatsorsuuteqarluni.
Inuit Ataqatigiinni siulittaasup, Múte B. Egedep partiimi siuttunngorneranit atuuffik siulleq naammassingajalerpoq. Múte B. Egede tupaallannanngitsumik siulittaasutut qinigassanngorteqqilerpoq, taannalu erseqqissaavoq atuuffimmi tullermi politikkikkut suli suliassaqangaatsiartoq.
- Ukiut arlallit amigartooruteqarluta ingerlareerluta aningaasanut naatsorsuutit ukioq manna aningaasaateqarnikkut sinneqartoorfiusut siullermeerluta saqqummiuttussanngorpagut. Tamanna soorunami nuannerpoq. Massakkumiilli aningaasaqarnitta pitsaasuuginnarnissaa anguniarlugu sulissaagut. Partiip aningaasaqarnera pitsaasuuppat immikkoortortaqarfiit partiillu politikkikkut anguniagaasa suliarinissaanut nukissaqarnerussagatta, IA-p siulittaasua Múte B. Egede Sermitsiaq.AG-mut oqarpoq.
Inuit Ataqatigiit Qaqortumi 6.-8. august ileqquusumik ataatsimeersuassaaq.
- Politikkikkut siunertarput aallaavigalugu ukiuni pingasuni tullerni anguniagassagut pillugit oqaloqatigiinnissat pitsaasuussasut naatsorsuutigaara, siger han.
Siuttuuneq attatiinnarneqarniarpoq
Immikkoortortaqarfinniit oqaluuserisassatut siunnersuutit IA-p allattoqarfianut ulluni makkunani nassiussorneqarput. Partiip allattoqarfiata naatsorsuutigaa oqaluuserisassat ataatsimeersuarneq sapaatit akunnernik pingasunik sioqqullugu, tassa kingusinnerpaamik 16. juli, saqqummiunneqarsinnaassasut.
Múte B. Egedep erseqqissarpaa partiip politikkikkut anguniagassaasa naalakkersuinikkut sulinermik tunuliaquttallu suliaannik nukittorsaassasoq. Isumaqatigiissutit atuutereersut aallaavigalugit politikkikkut aalajangersaasoqassaaq, aammali immikkoortortaqarfiit suliassaat ukkatarineqarnerulissapput.
- Politikkikkut maanna killiffipput anguniarlugu assoroorluta sulisimavugut. Maannalu arlalinnik borgmesteriutitaqarpugut Naalakkersuisoqatigiinnilu amerlanerussuteqarluarluta. Politikkikkut anguniagassatsinni qulakkiissavarput suli nunatsinni, kommunini nunaqarfinnilu siuttuujuarnissarput, oqarpoq nangillunilu:
- Partiimi politikkitta naalakkersuisunikkut sulinerput nukittunerulersissavaa. Soorunami suli innuttaasut pitsaanerusumik inuuneqarnissaat pillugu sulissaagut, Múte B. Egede oqarpoq.
Assigiinngisitaarneq nukittoqutaavoq
Inuit Ataqatigiit siulittaasuata partiimi assigiinngisitaartumik isummertoqartarsinnaanera oqaluttuaraa.
- Partii angisuujuvugut. Taamaammat aamma assigiinngitsunik isummersinnaaneq inissaqartinneqarpoq. Partiimili ilutsinni oqaloqatigiissinnaaneq pikkoriffigaarput, tassuunalu assigiinngitsunik isummersinnaanerput politikkikkut sulinitsinni nukittoqutitut atortarparput, oqarpoq.