Múte: Danskit akuersinerunerat inissaminiippoq
Kalaallit Nunaat Issittoq pillugu Siunnersuisoqatigiinni siunissami annertunerusumik pisinnaatinneqalernernissamut qilanaartoq, Naalakkersuisut siulittaasuat oqarpoq.
Issittoq pillugu Siunnersuisoqatigiinni Kalaallit Nunaat sunniuteqarnerulernissaa pillugu Danmarkip Kalaallit Nunaat naaperiarsimagaa sisamanngormat paasinarsivoq.
Siunnersuisoqatigiit siunissami ataatsimiinnerini Kalaallit Nunaat oqaaseqartuusassaaq, Issittorlu pillugu isumaqatigiissutini nunarput atsiortuusassalluni.
Naalakkersuisut Siulittaasuat Sermitsiaq.AG-mut oqarpoq taama iliuuseqarnermut pissutaasoq Kalaallit Nunaat naalagaaffeqatigiinni kisiartaalluni Issittumi inissisimammat:
- Taassuma saniatigut ataqatigiissaarisoqatigiinnik pilersitsissaagut siornatigornit suli sunniuteqarnerulertussanngorluta. Taamaasilluta kunngeqarfiup nunanut allanut politikkiani aamma sunniuteqaqataanerulissaagut.
'Head of delegation' pillugu suli nalorninartoqarpoq
- Alloriarneq pitsaasuuvoq inissaminiilluinnarlunilu. Issittormi nunarsuup sinneranit soqutigineqarnerulernikuuvoq, Múte B. Egede oqarpoq.
Issittoq pillugu Siunnersuisoqatigiinni kikkut sumi inissisimassanersut, aamma kina pisortnuna sorleq pisortatigoortumik head of delegation (aallartitat aqutsisuat, aaqq.) suli ilisimatitsissutigineqanngilaq.
- Oqaloqatigiinnerit ataatsimiinnerillu pitsaasumik unneqqarissumillu ingerlanneqarput. Sammisami qitiulluinnartut politikkikkut aaqqiissuteqarfigaagut, taakkulu nunatta nunanut allanut tunngasuni sunniuteqarnerulernissaannut alloriarnerupput annertuut, Múte B. Egede oqarpoq.
2013-imi boykot
Nunatta Issittoq pillugu Siunnersuisoqatigiivini inissisimanera siusinnerusukkut oqallisigineqartareerpoq. Aleqa Hammond 2013-imi Naalakkersuisunut siulittaasunermini aalassatsitsingaatsiarpoq. Tassami nunarput siunnersuisoqatigiit isumaqatigiinniarnerini issiaqataasinnaannginnera akerleralugu, Kalaallit Nunaat Issittoq pillugu Siunnersuisoqatigiinnut suleqataajunnaarsikkamiuk.
Ataatsimiinnernimi periusaajuarsimasoq, tassa Kunngeqarfiup Danmarkip sinniisui pingasuusut tamarmik Issittoq pillugu Siunnersuisoqatigiit isumaqatigiinniarnerini issiaqataasarnerat, Sverigep ataatsimiinnermi pineqartumi malinngilaa.
Tamanna isumaqarpoq Issittoq pillugu Siunnersuisoqatigiit isumaqatigiinniarnerini Kalaallit Nunaat issiaqataasinnaanngitsoq.
Aleqa Hammondip siunnersuisoqatigiinnit peqataajumajunnaarnerata kingorna ataatsimiinnerni periusissamik nutaamik isumaqatigiissusiortoqarpoq. Tamanna isumaqarpoq nunatta Namminersorlutik Oqartussaanermi akisussaaffigisai isumaqatiginninniartillugit, Kalaallit Nunaat siunnersuisoqatigiinni issiaqataasarsinnaasoq.
Isumaqatigiissutip qiviaqqinnissaa inissaminiippoq
Kalaallit Nunaanni Savalimmiunilu illersornissamut annertunerusumik aningaasaliissuteqarnissamut danskit isumaqatigiissutaat pillugu ulluni kingullerni oqallinnermut tunngatillugu siulittaasoq oqarpoq suli isumaqatigiinniartoqassasoq:
- Ilumoorpoq, soorlu illersornissamut ministeri aamma nunanut allanut tunngasunut naalakkersuisoq Pele Broberg oqareersut, illersornissamut tunngatillugu isumaqatigiissut pillugu oqaloqatigiinnerit pitsaasut suli ingerlapput, nunat tamatta iluarisinnaasatsinnik aaqqiisoqarnissaa pillugu.
- Soorlu aamma ministeriuneq oqarsimasoq, isumaqatigiissutip imarisai Naalakkersuisut nutaat peqatigalugit misissorneqarnissaat nalilersoqqinnissaallu nalinginnaasuuvoq, Múte B. Egede oqarpoq.