Siullermi Parisimi isumaqatigiissut taavalu aatsitassanut inatsit qassiiliuutaapput marloriarlunilu tatiginninnginnermik taasisitsisoqarluni.

Upernaakkut ataatsimiinneq Naalakkersuisunut arlalinnik unammilligassaqartitsisimavoq, siulittaasorli Múte B. Egede (IA) isumaqarpoq, naalakkersuisoqatigiinni pitsaasumik suleqatigiinneq ajornartorsiutinit taallerneqarsimanngitsoq.

- Naalakkersuisoqatigiinnut partiini angisuuni marlunni siamasissumik tunngaveqartuni aqutsisuuvunga, taakkualu tamarmik immikkut soorunami assigiinngitsunik isumaqartarput. Tamatigut isumaqatigiittanngikkaluarluta taamaakkaluartoq aaqqiissutissanik nassaarniartarneq pikkoriffigaarput, isumaqarpunga suleqatigiinnitsinni tamanna pitsaasuusoq.

Inatsisartut ataatsimiittarfianni aaqqiagiinnginnerit pileraangata apererusunnarsinnaasarpoq naalakkersuisoqatigiit suliassanik Inatsisartuni oqaluuserineqalersinnagit aaqqissuussilluarnissamut naammattumik pikkorissuseqarnersut.

- Tamakkununnga tamatigut pikkorinnerulersinnaasoqartuaannarpoq. Naalakkersuisoqatigiit ukiup ataatsip missaani atuussimapput, taamaattumik suleqatigiinnerup nukittorsarnissaanut pissutsinik nutaanik nassaassaqartuartarpugut. Pitsaanerpaaq tassaavoq partiit taakkua marluk akornanni ineriartornartumik ingerlaavartumillu oqaloqatigiittarnerput, taamaalillutalu aatsitassanut inatsimmi takusatsitut aaæajangiisinnaanngortarluta.

Isumaqatigiinnginnerit naaperiaqatigiinnermik inerneqartut

Aatsitassanullu inatsit Inatsisartut ataatsimiittarfianni aaqqiagiinnginnernik annertuunik pilersitsivoq, tamatumanilu Siumut aamma Aatsitassanut Inatsisillu Atuutsinneqarnerannut Naalakkersuisoq, Aqqaluaq B. Egede, illuatungiliuttunik isornartorsiorneqaangaatsiarlutik.

Siumut IA isumaqatigisinnaalerniarlugu nammineq politikkiminik sanioqqutsisutut pasillerneqarpoq, Naalakkersuisullu inatsisiliornermik suliaqarnermi sullerippallaarsimanngitsutut isornartorsioneqarluni. Taamaattorli siunnersuut upernaakkut ataatsimiinnerup ulluani kingullermi akuersissutigineqartoq pillugu naalakkersuisoqatigiit uppeqajaasimanerannik oqalunneq Múte B. Egedep ilumuunnginnerarpaa.

- Isumaqarpunga uppeqqajaasimanngitsugut. Oqaatigineqartutut isumaqatigiittuaannanngilagut, isumaqarpungalu inuiaqatigiinni tamat oqartussaaqataanerannik tunngaveqartuni naalakkersuisoqatigiinni, partiini innuttaasunilu assigiinngitsunik isumaqarfigisatsinni tamanna aamma peqqinnartuusoq. Taamaaliornikkut eqqarsaatit naaperiaqatigiinnerillu inuiaqatigiinnut pitsaanerpaasussat pilersinneqartarput.  

Ataatsimiititaliap unikaallatsitsinera ajunngilaq

Parisimi isumaqatigiissut oqallinnermik annertuumik aamma pilersitsivoq naggataatigullu ataatsimiititaliamit unitsikkallarneqarluni, siunnersuut ukiakkut ataatsimiinnermi naammassillugu suliarineqalersinnagut pissutsit arlallit paasiniarnissaat kissaatigineqarmat. Isumaqatigiissummut qularutiginnittut ilaatigut tassapput Demokraatit partiilu naalakkersuisoqataasoq Siumut, Parisimi isumaqatigiissutip ilannguffiginissaa Naalakkersuisunit saqqummiunneqartoq pillugu isumaqatigiissummi ersarissumi peqataagaluartoq.

Múte B. Egedelli oqaatigaa, ataatsimiititaliap siunnersuutip suliarinissaanut piffissaqarnerorusunnera ataqqilluinnarneqartoq, naak ataatsimiititaliami amerlanerussuteqartut tassaagaluartut partiit naalakkersuisoqatigiissut Siumut aamma IA.

- Siunnersuumik ersarissumik saqqummiussisimavugut, ataatsimiititaliamut ingerlateqqinneqartumik, siunnersuutillu qanoq ineriartornerata takunissaa qilanaaraarput. Inatsisartut suliamik suliaqarnerat ataqqilluinnarpara.