Múte ulapittoq: Inatsisit nutaat arfineq-marluk atuutsinneqalersut
Naalakkersuisut Siulittaasuata Múte B. Egede Inatsisartut inatsisissaattut siunnersuutit arfineq-marluk akuerisimavai, taakku ukiakkut ataatsimiinnermi akuersissutigineqarput.
Naalakkersuisut Siulittaasuat Múte B. Egede tallimanngornermi novembarip 19-iani ulapissimavoq.
Inatsisartummi inatsisissaat arfineq-marluk nutaat ukiaq manna Inatsisartut ataatsimiinneranni akuerineqarsimasut atsiorlugit pisortatigoortumik akuerisimavai.
Inatsisit nutaat taakku inuit innarluutilli ikiorneqartarnissaannut, meeqqat tapersersorneqarnissaannut, meeqqat atuarfiannut, utoqqalinersiutinut siusinaartumillu soraarnerussutisialinnut tunngassuteqarput.
Namminersorlutik Oqartussat tusagassiorfinnut nalunaaruteqarlutik taamatut ilisimatitsipput.
Sioqqutsisumik soraarninngorsinnaaneq
- Nuannaarutigaara naalakkersuisooqatigiinnissamik isumaqatigiissummi upernaaq atsiorsimasatsinni anguniakkatta ilaat piviusunngorsinnaalereermata. Utoqqartatta utoqqalinerminni toqqissisimaneq misigisussaavaat, taamaattumillu ukiut soraarninngorfissat sioqqullugit utoqqaat soraarninngorsinnaanerat inatsisip nutaap periarfissaalersissavaa, Múte B. Egede oqarpoq.
Maanna 67-inik ukiullit soraarninngorsinnaalersarput, inatsisillu nutaap sivikinnerpaanik ukiuni 35-ni timikkut tarnikkullu assoroornartumik sulisimasut sulilu sulisartuusut 65-inik ukioqarlutik soraarninngorsinnaanissaannik periarfissippai.
Inatsisit nutaat arfineq-marluk taakku saqqummiunneqareerput. Ugguuna takusinnaavatit.