Múte statsministerimik ataatsimeeqateqassaaq
Naalakkersuisunut siulittaasuulersussaq Múte Bourup Egede, Danmarkip statsministerianit Mette Frederiksenimit saaffigineqareerluni aqagu ataasinngornermi ataatsimeeqatigissavaa.
Statsministeri Mette Frederiksen Kalaallit Nunaanni Naalakkersuisunut siulittaasussamik ataatsimeeqateqassaaq.
- Mette Frederiksenimik ataatsimeeqateqarnissaq qilanaaraara, aqagu ataasinngornermi ataatsimeeqatigissavara. Eqqissisimasumik ataatsimiinnissarput naatsorsuutigaara, suleqatigiilluartoqarnissaanilli tamatta kissaateqarpugut. Mette Frederiksenip ataatsimiinnermi suut qaqilertussanerai ilisimanngilara, Múte B. Egede Sermitsiaq.AG-mut oqarpoq.
Naalakkersuisut Siulittaasuata Naalakkersuisoqarfiani pisortaaneq Hans-Peder Barlach Christensen aamma ataatsimeeqatigisussaallugu ilisimatitsivoq. Tassani Naalakkersuisunut siulittaasuusup eqqumaffigisassai eqqartorneqassapput.
Mittarfissualiornerit
Mittarfiliortiternissat qanoq inissisimaneri qulaajaaffigineqarnissaasa misissorneqarnissaat Múte Bourup Egede Naalakkersuisooqatigiilersussallu sulissuteqassamaarput. Aamma Qaqortumi mittarfissap qanoq akeqarnissaa misissorneqassaaq.
Kujataani mittarfiliornissaq qanoq akeqassanersoq Kalaallit Airports aalajangiusimavoq.
- Mittarfissuit pillugit qanorpiaq inissisimasoqassanersoq qulaajaaffigineqartariaqarpoq. Maannakkut inissisimaffik suunersoq suullu unammilligassaanersut ilisimaneqartariaqarput, Múte B. Egede oqarpoq. Nunatta kujataani angallannerup eqaallisarneqarnissaa naqissuserpaa.
Inatsisartut peqataatinneqassapput
Naalakkersuisuulertussat mittarfiliortiternissanut qanoq inissisimanersut Múte B. Egedep toqqaannartumik oqaaseqarfigerusunngilaa. Suliarli Inatsisartut peqatigalugit qulaajarneqassasoq oqarpoq.
- Inatsisartut suleqatigineqassapput, siunissami akiitsorineqalersussat aamma qulaajarneqassapput, Naalakkersuisooqatigiit isumaqatigiissutaanni erserpoq.