Múte sakkortuumik isornartorsiuisoq: Danmarkip spiralilersuisimanermik suliap qulaajaaffigineqarnissaa kinguarsarpaa

Naalakkersuisut siulittaasuata Facebookimi ilanngussami spiralilersuisimanermik suliamik qulaajaanissamut atatillugu Danmark isornartorsiorpaa.

Spiralilersuisimanermik suliap qulaajjaaffigineqarnissaata aallartinneqarsimannginnera akuersaarneqarsinnaanngilaq, Múte B. Egede oqarpoq.

Naammagittarneq tamaanga killeqarpoq, Naalakkersuisut siulittaasuat, Múte B. Egede (IA), Facebookimi ilanngussami allappoq.

Tassani Naalakkersuisut siulittaasuata Danmark spiralilersuisimanermik suliamik, kalaalerpassuit - ilaasa akuerseqqaarnatik ajoquseeqisumillu - ukiut arlallit ingerlaneranni spiralilersorneqarfigisimasaannik - qulaajaanissamik paamaarussisutut uparuarpaa.

- Danskit nunatsinni kusanaatsuliaasa ilaat, spiralilersuisimaneq taassumalu qulaaffiginissaanut 2022-mi ukiakkut aallartinnissaanut isumaqatigiissutaasup aallartinnissaanut danskit paamaarussipput, Múte B. Egede allappoq nangillunilu:

- Tamanna akuersaanngilluinnarpara, qulaajaanermi ingerlanneqalereersimasussaagaluarpoq. Suliaq piaarnerpaamik aallartittariaqarpoq. Minnerunngitsumik arnat akuersaarneqarsinnaanngitsumik pineqarsimasut pillugit.

Qulaajaanissaq kinguaattooqqasoq

Múte B. Egedep isornartorsiuinini sumik tunngaveqartinnerlugu tigussaasumik padasissutissiissutiginngilaa, Sermitsiaq.AG-lu itisiliissutaasumik apeqqarissaarfiginninnissamik qinnuiginnippoq.

Qulaajaanissarli piffissaliussaaqqaarsimagaluartumut atatillugu kinguaattooqqavoq.

Danmarkimi nunamut namminermut peqqissutsimullu ministereqarfik Sermitsiaq.AG-mut marsip naalernerani paasissutissiivoq, ilisimatusartunik qulaajaanermik suliarinnittussanik erniinnap pissarsinissaq neriuutigineqartoq.

Qulaajaaneq isumaqatigiissutip pilersinneqarneranit ukiut marluk qaangiunneranni naammassineqartussaavoq, tassa imaappoq, siusinnerpaamik 2025-mi upernaakkut naammassineqassaaq. Qulaajaanerup oktobarimi 2024-mi naammassinissaa siunniunneqassasoq isumaqatigiissutaaqqaarsimagaluarpoq.

Powered by Labrador CMS