Múte Ruslandip saassussinera pillugu: Nunarput kinguneqartitsinissamut piareersimavoq
NATO nunallu suleqataasut peqatigalugit Kalaallit Nunaat Ruslandimut kinguneqartitsinissamut piareersimavoq. Pissutsit Naalakkersuisunit qanimut malinnaavigineqarput.
Rusland Ukrainemut sisamanngorneq 24. februarip unnuaani saassussivoq. Nunat allarpassuit assigalugit Naalakkersuisut pissutsit akunnermiit akunnermut allanngorarnerannut malinnaapput.
- Pisut ilungersunarluinnartutut isigeriikkakka suli ilungersunarnerulertutut isigivakka. Aamma akuersaarneqarsinnaanngilaq massakkut taamatut sakkulersorluni saassussineq, Naalakkersuisut Siulittaasuat Múte B. Egede Sermitsiaq.AG-mut oqarpoq.
Nunat arlallit Ruslandimut qanoq kinguneqartitsisoqassanersoq pillugu maanna isumaqatigiinnialeruttorput.
Nunallu taakku, tassa NATO-p ilaasortaai aamma EU-mi nunat, assigalugit nunarput kinguneqartitsinissamut piareersimasoq Naalakkersuisut siulittaasuat oqaluttuarpoq.
- Nunarput massakkoqqissaaq piareersimavoq soorunami. Nunat tamalaat akornanni isumaqatigiissutit unioqqutinneqarpata aamma tamanna soorunami isiginngitsuusaasinnaanngilarput. Oqaatigissanngilarali kinguneqartitsinissaq qanoq ittuunersut, Múte B. Egede oqarpoq.
Inuussutissarsiornerup iluani tusarniaanerit aallartipput
Sulisitsisut ilisimatitsipput Kalaallit Nunaat Ruslandimut niueqateqarnermi 2021-mi 580 milliuunit koruuninik isertitaqarsimasoq.
Folketingimi ilaasortap Aaja Chemnitz Larsenip Sermitsiaq.AG-mut assersuutitut taavaa kinguneqartitsinissaq tassaasinnaasoq Ruslandimut aalisakkanik assigisaanillu niuernermik unitsitsineq. Taamatulli kinguneqartitsineq Ruslandimut annertuumik sunniuteqarnavianngitsoq.
Naalakkersuisut siulittaasuata naalakkersuisoqarfianit inuussutissarsiornerup iluani tusarniaanerit aallartereersimavai.
- Pingaaruteqartorujussuuvoq aningaasarsiorfigisatta innarlerneqarsinnaanerat eqqumaffigissallugit. Taamaammat aamma qanimut, pisut ingerlarsornerat aallaavigalugu, suliffeqarfiit aamma, pingaartumik niueruteqangaatsiartut tusarniarneqarlutik massakkoqqissaaq ingerlanneqarpoq, Múte B. Egede Sermitsiaq.AG-mut oqarpoq.
Issittup eqqissisimasuunissaa suli pingaartinneqarpoq
Pisuni taama ittuni pissusissamisoorpoq partiit siuttui tamarmik Inatsisartunilu nunanut allanut sillimaniarnermullu ataatsimiititaliaq pisunik malinnaatinneqarnissaa. Alloriarfiusinnaasut pillugit aamma oqaloqatigineqassapput.
Naalakkersuisut siulittaasuata oqaatigaa Kalaallit Nunaat aamma Issittoq eqqissisimatinneqarnissaat pingaartilluinnarlugu.
- Naalakkersuisut kissaatigaat Issittoq uani akulerunneqassanngitsoq. Issittoq eqqisseqatigiiffiusoq isumaqatigiissutaanikuummat nunarsuarmioqatigiit nunallu issittumik killeqarfillit akornanni. Aammalu taamaalilluni issittup ineriartornera sakkulersorfiunngitsumik ingerlasussatut isumaqatigiissuteqarfigalugu, Sermitsiaq.AG-mut oqarpoq.
Taassuma neriuutigaa Ruslandip sakkulersorluni saassussinera piaartumik annikillisarneqassasoq, oqaloqatigiinnikkullu aaqqiagiinnginneq aaqqinneqassasoq.