Múte RAL-imut isornartorsiuisoq: Amigartooruteqarneq annertuallaarlunilu oqaloqateqarneq pitsaanngippallaarpoq
Naalakkersuisut Royal Arctic Linemi annertuumik amigartooruteqarneq akuerinngilaat, 2023-milu sinneqartooruteqartoqarnissaanik naatsorsuutiginnipput. Tamatuma saniatigut umiarsuaatileqatigiiffiup inuussutissarsiortunik ataqqeqatigiilluni oqaloqatigiinnermik pilersitsissaaq, Naalakkersuisut siulittaasuat, Múte B. Egede (IA), Royal Arctic Linep ileqquusumik ataatsimeersuarnerani taama oqarpoq.
Namminersorlutik Oqartussat umiarsuaatileqatigiiffiat Royal Arctic Line (RAL), ataasinngornermi ileqquusumik ataatsimeersuartoqarnerani piginnittunit isornartorsiorneqarpoq.
Ingerlatseqatigiiffik 2022-mi naatsorsuutigisamit annertunerusumik amigartooruteqarnera – 55-56 mio. kr.-nik amigartooruteqarnissamik naatsorsuuteqarluni 96 millionit koruuninik amigartooruteqarnera, Naalakkersuisut siulittaasuata Múte B. Egedep naammaginngilaa.
- Ingerlatseqatigiiffiup siorna amigartooruteqarnera aallaqqaasiutigalugu ammasumik oqaatigaara. Tamanna naatsorsuutigineqarsimavoq, amigartoorutaasulli naatsorsuutigisamik annertunerujussuupput.
- Piginnittut pissutsit taakku akuerinngilaat, ukiumilu tulliuttumi aaqqinneqarlutillu pitsaasumut mumisinneqarnissaat kissaatigalugu, Múte B. Egede oqarpoq.
Suleqatigiinnerup amigaatigineqarnera isornartorsiorneqartoq
RAL-ip nalunaarutaa naapertorlugu, Aalborgimi umiarsualivimmi aamma Aarhusimi umiarsualivimmi 2023 affaani kingullermi marloqiusamik ingerlatsinermut aningaasartuuteqarnerup akuerineqarsimanera, amigartooruteqarnermut pissutaasut ilagaat, kiisalu Aalborgimi sulisunik suliunnaarsitsisoqarmat. Aalborgimit nuutsitsineq maanna naammassivoq, RAL-ilu 2023-mi annertunngitsumik sinneqartooruteqarnissamik naatsorsuuteqarpoq.
Aningaasaqarnerup saniatigut Múte B. Egedep ingerlatseqatigiiffiup atuisuminik oqaloqateqarnerminut tunngatillugu iliuuseqarnissaanik oqariartuuteqarpoq. Tassa februaarimi containerit qerititsiviusunik avammut assartuinermi akinik qaffaanermut atatillugu aalisarnermik suliaqartunit attaveqatigiinneq pillugu isornartorsiuineq annertuvoq. Inuussutissarsiortut tassani akit qaffanneqarnissaat pillugit ullut arlaqanngitsut sioqqullugu paasitinneqarput.
RAL suleqatigisanik atuisunillu tusarnaarnissamut suleqatiginninnissamullu naammaginanngitsumik iliorsimasoq, Múte B. Egede oqarpoq.
- Royal Arctic Linemi akisussaasut inuussutissarsiortunut aamma inuiaqatigiinnut isumatusaartumik minnerunngitsumillu ataqqeqatigiilluni oqaloqatigiinnermik pilersitsinissaat, Naalakkersuisut naatsorsuutigigaat, uani ataatsimeersuarnermi erseqqissarneqartariaqarpoq.
Akit qaffanneqarnissaannut inuussutissarsiortunik oqaloqateqarnermut tunngatillugu, RAL-imi pisortap Verner Hammekenip siornatigut oqaatigaa, akit qaffanneqarnissaannik politikkikkut akuersititsiniarneq sivisuumik ingerlanneqarsimasoq, aamma akuerineqartinnagu ingerlatseqatigiiffik atuisunut nalunaaruteqarniarsimanngitsoq oqaatiginikuuaa.