Múte pillugu ilanngutassiamut nassuiaat: Tusagassiornikkut kukkussuteqarsimaneq ajuusaarutigineqartoq
TV2-p siulersuisuini siulittaasup qinersisoqanngitsiarnerani Múte B. Egede pillugu kukkusumik tusagassiisimaneq ajuusaarutigaa. Inuttut kukkussuteqartoqarneratigut ilanngutassiaq saqqummiunneqarsimasoq, siulersuisut siulittaasuat kultureqarnermut ministerimut nassuiaammini allappoq.
Ukioq manna siusinnerusukkut kultureqarnermut ministeriusimasup Joy Mogensenip (Soc.) TV2-p siulersuisuinut piumasaraa, Múte B. Egede pillugu eqqunngitsunik tunngavilersuuteqarluni tv2.dk-kkut sooq ilanngutassiisoqarsimaneranik nassuiaasiortoqassasoq.
TV2-p siulersuisuni siulittaasoq Jimmy Mauumann nassuiaammi allappoq, inuttut arlalitsigut kukkussuteqartoqarsimaneratigut ilanngutassiaq TV2-mit saqummiunneqartussatut akuerineqarsimasoq. Siulittaasup suliaq alianartuunerarlugulu ajuusaarutiginerarpaa;
- TV2-p Kalaallit Nunaanni Inatsisartunut qinersisoqarnerani tatiginartumik tunngavissaqarluartumillu ilanngutassiorniarnerani ajuusaarnaqisumik, tv2-dk-kkut kukkusumik saqqummiussisoqarsimaneranut atatillugu tusagassiornikkut kukkusoqarsimavoq, nassuiaammi Folketingip Kultureqarnermut ataatsimiititaliaanut nassuinneqarsimasumi allassimavoq.
Ilanngutassiaq pineqartoq apriilip qaammataani qinersisoqanngitsiartoq saqqummiunneqarsimavoq, tassanilu atuarneqarsinnaavoq, Múte B. Egede suliani marlunni aningaasaqarnikkut iluanaarutigisartakkamini suliamut attuumassuteqarpallaarnini oqaatigisimanngikkaa.
Inuttut kukkussutit paatsuuisimanerillu
Taamatulli pisoqarsimaneraanerit eqqortuunngillat, tamatumalu malitsigisaanik TV2-mi naalagaaffimmit pigineqartumi imminut nalilersuisoqarsimavoq, tassungalu atatillugu siulersuisuni siulittaasup suliaq ajuusaarutigaa:
- TV2-mi misissuisoqarsimanerani oqaatigineqareersutut inerniliunneqarpoq, inuttut kukkussuteqartoqarsimaneratigut arlalitsigullu paatsuuisoqarsimaneratigut ilanngutassiaq saqummiunneqartussat akuersissutigineqarani saqqummiunneqarsimavoq, taamalu TV2-p aaqqissuinermi periusai aalajangersimasut naapertorlugit pitsaassusaa qulakkeerneqarsimanani, nassuiaammi allassimavoq.
Siulersuisuni siulittaasup ilanngullugu ilisimatitsissutigaa, TV2-p 'Isiginnaartartunut aaqqissuisuata' suliaq misissorlugu aallartissimagaa. Isiginnaartartut aaqqissuisuat TV2-mi aalajangiisartuuvoq arlaannaannulluunniit attuumassuteqanngitsoq, aaqqissuisartorlu TV2-mi aaqqissuisut atortuinik takunnissinnaatitaallunilu sulisunik pisortanillu oqaloqateqarlunilu apersuisinnaatitaavoq. Misissuineq aggustimi naammassissangatinneqarpoq, inerniliussarllu TV2-mi siulersuisut aqutsisullu pissarsiarereerpatigit tamanut saqqummiunneqassallutik.
Ministeri: Suliaq ilungersunartuuvoq
Kultureqarnermut ministeri nutaaq Ane Halsboe-Jørgensen (Soc.) Folketingip Kultureqarnermut ataatsimiititaliaaut akissuteqarluni allappoq, ministeritut tusagassiorfiit arlaannaannulluunniit attuumassuteqanngitsut aaqqissuisutut aalajangigaannut akuliussinnaanani:
- Erseqqilluinnartumilli oqaatigerusuppara suliaq ilungersunarluinnartutut isigingakku, oqartussaaqataanerullu aqqani qinersisoqartussaasoq tamanna pisimammat suli ilungersunarnerulluni. Taamaammat TV2-mut kaammattuutigerusuppara, suliaq manna pineqartoq ilungersuulluinnarlugu tigussagaat, Ane Halboe-Jørgensen ataatsimiititaliamut allappoq, nangillunilu:
- Ilanngullugu maluginiarpara, Isiginnaartartunut aaqqissuisoqa suliap ingerlanneqarsimaneranik misissuilluni aallartissimasoq, inerniliussaasalu atuarnissaat qilanaaraara. Tamatuma saniatigut TV2-p aaqqissuisoqarnikkut pitsaassutsimik qulakkeerinnittarnerata qanoq pitsanngorsaaffigineqarsinnaanera pillugu siulersuisuni siulittaasumik oqaloqateqarnissara qilanaaraara.