Naalakkkersuisut siulittaasuat, Múte Bourup Egede (IA) naalakkersuisooqatigiit IA-p Siumullu suleqatigiinnerannut allannguisoqarsinnaaneranut piareersimavoq.

- Pitsaasumik siunnerfilersukkamillu naalakkersuisooqatigiinni suleqatigiippugut, soorunalumi neriuutigivara tamanna ingerlaannarsinnaajumaartoq qinigaaffiup sinnerani, taamaalillutalu naalakkersuisooqatigiit akornanni politikkikkut anguniassallugit siunniussagut timitalersukkagullu nangissinnaassagatsigit. Taamaattorli erseqqissaatigissavara arlaannaatigulluunnit Siumup ataatsimeersuarneranut akuliukkusunnginnama, taamaallaalli ataatsimeersuarluarnissaannik kissaappakka, Múte Bourup Egede Sermitsiaq.AG-mut erseqqissaavoq.

Qinersisoqarnissaanik nalunaaruteqartariaqalersinnaavoq

Aperineqarami arlaatigut aalajangersimasumik pisoqarneratigut maanaannaq Inatsisartunut qinersisoqartariaqalersinnaanersoq, Múte Bourup Egede akivoq, allatut ittumik Inuit Ataqatigiit tusagaqartinnagit naatsorsuutigalugu IA-p Siumullu naalakkersuisooqatigiinnerat ingerlaannassasoq:

- Kisianni soorunami pisinnaasut assigiinngitsut sillimaffigisariaqarpagut.

Pisut kissaatigisamisut ingerlassappata naalakkersuisooqatigiinneq taamatut iluseqarluni ingerlaannarsinnaavoq. Taamatuttaaq sillimaffiginerarpaa Siumumit piumasarineqarsinnaasoq nutaamik isumaqatigiinniartoqassasoq naalakkersuisooqatiigit toqqammaviat allanngornissaanik piumasarineqarnissaa piumasarineqassappat, naalakkersuisooqatigiinnullu pitsaannginnerpaamik pisoqassappat Siumut nalunaaruteqarsinnaavoq naalakkersuisooqatigiinneq tassunga killeqartoq.

- Taamaammat aap, allannguuteqartoqarsinnaanera sillimaffigaarput, allaallu maanaannaq qinersisoqarsinnaanera avaqqunneqarsinnaajunnaarsimassappat aamma taanna sillimaffigaarput, Inuit Ataqatigiit aammalu Naalakkersuisut siulittaasuat, Múte Bourup Egede Sermitsiaq.AG-mut oqarpoq.