IA-p nuna tamakkerlugu ataatsimeersuarnerani IA-p Naalakkersuisullu siulittaasuat Múte B. Egede, nunanut allanut naakakkersuisup Pele Brobergip (N) nalunaarutai oqaaseqarfigisariaqalersimavai.

Múte B. Egede tusagassiorfinnut nalunaaruteqarluni allappoq, Pele Brobergip danskit aviisiannut Berlingskemut oqaaseqaatai isumaqatiginagit.

Pele Brobergip aviisimit apersorneqarnermini oqaatigaa, inuit kisimik, tassa nunamut nuussimasuunngitsut namminersulivinnissaq pillugu oqallinnermut taamaallaat akuusariaqartut. 

Taamatut oqaaseqarsimaneranut atatillugu Múte B. Egede oqarpoq:

Assigiinngissitsinissaq siunertarineqanngitsoq

- Nunatsinni innuttaasut tamarmik naligiimmik assigiimmillu pisinnaatitaaffeqarput, taakkulu Naalakkersuisut qaqugumulluunniit illersortuassavaat. Tamallu oqartussaaqataanerat qaqugumulluunniit illersorneqartuartariaqarpoq.

- Innuttaasullu nunatsinni assigiinngitsumik pineqarnissaat, taasinernut allanullu mattunneqarnissaat Naalakkersuisut Naalakkersuisooqatigiillu isumarinngilaat, Naalakkersuisut Siulittaasuat oqarpoq.

Múte B. Egedep oqaatigaa, Brobergip oqaaseqaatai imatut paasineqarsinnaasut, inuit taakkulu kinguaavi namminersulivinnissaq pillugu kisimik taasisinnaasariaqartut.

Brobergilli taamatut saqqummiussisoqarnera isumaqatiginngilaa. Taassumami Sermitsiaq.Ag-mut oqaatigaa, apeqqummut pineqartumut isummersimanani.

- Nuussimasutut qanoq isumaqarneq pingaaruteqanngitsoq

Brobergip aviisimut oqaatigaa:

- Thailandimiut, danskit, tuluit, franskit allallu maani najugaqartut namminersulivinnissamut pisinnaatitaaffeqanngitsut. Inuit pisinnaatitaaffeqartut oqaatigalugu. Nunamut nuussimasutut qanoq misigisimaneq qanorlu isumaqarneq, taasisinnaatitaaneq pillugu oqallinnissamut pingaaruteqanngillat.

Pele Brobergip ilanngullugu oqaatigaa, immikkoortitsinissaq ilimananngitsoq. Imaassinnaasorlu kikkut tamarmik taasitinneqartut.

- Assigiinngisitaarneq peqqinnartuusoq

Múte B. Egedep tusagassiorfinnut nalunaaruteqarnermi erseqqissaassutigaa, Naalakkersuisut Namminersorneq Pillugu Inatsit aallaavigalugu sulisut:

- Nunattalu namminiileriartorneruneranut sulinermi suleqatissagut, Namminersorneq Pillugu Inatsit tunngavigalugu tassaammata danskit naalakkersuisui, tamannalu naalakkersuisut siulittaasuata susassaqarfigaa.

- Naalakkersuisut nunatsinni innuttaasut sinnerlugit kiffartuussipput, tunngaviusumillu isumaqarpugut assigiinngisitaarnerput peqqinnartuusoq avissaartuffiussanngitsorlu.