Múte naalagaaffeqatigiit ataatsimiinnissaannut piareertoq: Ingerlalluanngitsut oqaloqatigiissutigisinnaasariaqarpavut
Ministerit arfineq-marluk uani sapaatip-akunnerani Nuummut tikeraassapput, Attaveqaqatigiinnissamut ataatsimiititaliaq tassani ataatsimiissaaq, ukiumoortumillu naalagaaffeqatigiit ataatsimiinnerat ingerlanneqassaaq. Múte B. Egede, Vivian Motzfeldt aamma Naaja Nathanielsen Nunatsinnit peqataassapput.
Savalimmiormiut lagmandiat arfininngornermi Nuummut tikippoq, Mette Frederiksen USA-p præsidentianut Joe Bidenimut ataasinngornermi tikeraarnermi kingorna marlunngornermi tikinnissaa naatsorsuutigineqarpoq.
Ataatsimiinneq kalaallinit aamma allamut tunngatillugu peqataaffigineqarsinnaagaluartoq. Tassa Kalaallit Nunaat pillugu Kalaallit Nunaat avaqqullugu oqaluuserinnittoqartassannginneranik isumaqatigiissut ataqqineqassappat.
Kisianni Mette Frederiksenip præsidentimik ataatsimeeqateqarnerani kunngeqarfiup avannarpasissortaa oqaluuserisassanut ilaanngitsoq, Múte B. Egede oqaluttuarpoq.
- Peqataatinnata Issittoq pillugu oqaluuserinnittoqartassanngitsoq ersarissumik isumaqatigiissuteqarpugut. Eqqaaneqassappat, taava Kalaallit Nunaat pillugu kalaallinit peqataasoqartinnagu oqaluuserinnittoqartassanngitsoq Mette Frederiksenip Joe Biden oqaluttuarfigissavaat, taanna naqissusiivoq.
Danskit tusagassiorfiini sakkortuumik isornartorsiuineq
Nuummi pingasunngorpat naalagaaffeqatigiit ataatsimiinneranni suleqatigiinneq aamma tamatumunnga ministerimit ataatsimit ataqqinninngitsoqarnera pillugu oqaluuserinnittoqassaaq, Múte B. Egede oqarpoq. Taanna qanittukkut danskit tusagassiorfiisigut Danmarkip nunanut allanut tunngasunut ministerianik Lars Løkke Rasmussenimut (M) sakkortuumik isornartorsiuivoq.
- Qaammatini arlalinni tamanna piartorpoq. Tusagassiortumit tamakku suliat pillugit toqqaannartumik aperineqarpunga, taava soorunami tamanna ajortuusoq oqaatigaara.
Issittumi aallartitamik toqqaasoqarnerata kingorna isornartorsiuineq pivoq, taanna Kalaallit Nunaannut attuumassuteqanngitsuuvoq.
Danmarkimi nunanut allanut tunngasunut ministerip saqqummeriaasaata Kalaallit Nunaata Danmarkillu akornanni suleqatigiinnermi ingerlalluarneq danskit naalakkersuisuisa siuliini pisoq ajoquseraa, Naalakkersuisut siulittaasuat aamma isumaqarpoq.
- Kalaallit namminiilivinnissamik kissaateqarnerat innuttaasunik pututitsiniarnerusoq, danskit nunanut allanut tunngasunut ministeriata oqarnera paasiuminaatsorujussuuvoq. Aammattaaq Mette Frederiksenip siornatigut naalakkersuisoqatigisaanik pitsaasumik suleqateqarnermik aallartitsisimanitsinnut, kissaatitsinnut ataqqinnittumik, tusarnaarlunilu kinguneqartussanik oqaloqatigiittarnitsinnut pitsaanngitsumik pissuseqarpoq.
Ministeriunermik oqaloqateqarneq pitsaasut
Attaveqaqatigiinnissamut ataatsimiititaliami suut oqaluuserineqassanersut Múte B. Egedep saqqummiussinnaanngilaa.
Kisianni naalagaaffeqatigiit ataatsimiinneranni nunarsuarmi tamarmi naalakkersuinermik ingerlatsineq nalorninarseqqasoq, aamma Kunngeqarfik Danmarkimi suleqatigiinnermi unammillernartut oqaluuserineqassapput.
- Pitsanngoriartitassaqarnerani suut tamarmik pitsaasuusut oqarsinnaanngilagut. Ministeriunermik suleqateqarnera oqaloqateqarneralu pitsaavoq, taamaattumillu suleqatigiinnermi pitsanngoriartinneqartariaqartut pillugit oqaloqatigiissinnaassalluta naatsorsuutigaara, tassani ingerlalluartoqassappat naligiittariaqarpugut.