Múte missingersuutinut inatsimmik suliaqarnissamut piareeqqasoq

Aningaasaqarnermut Siunnersuisoqatigiinni siulittaasup Torben M. Andersenip siusinnerusukkut oqaatiginikuuaa, missingersuutinut inatsit Kalaallit Nunaata aningaasaqarnerata patajaanneranut qulakkeerinneqataasimavoq, tassa aningaasartuuterpassuit isertitanit matussuserneqarsinnaanngitsut amerliartuinnannginnissaannut qulakkeerinneqataallluni.

Amigartooruteqarsinnaasoq

Naalakkersuisooqatigiinnissamut isumaqatigiissummi allassimavoq ”aningaasaliissutit siunissami ineriartortitsinissamut qulakkeerinnissinnaappata aningaasanut inatsit amigaartooruteqarsinnaasoq”.

Missingersuutinut inatsit qanorluunniit inerneqaraluarpat soqutigissanngiliuk?

- Aningaasanut inatsisit amigaartooruteqarnissaat imatut anguniagarinngilarput. Tamanna erseqqissaaffigerusuppata. Siunnissamili ineriartornissamut aningaasaliissuteqarnerput pissutigalugu amigaartooruteqarnissap akuerineqarnissaa naapertuussinnaavoq, Múte B. Egede missingersuutinut inatsimmi aningaasaliissutinik atuinerunissamut suna suullu pineqassanersut itinerusumik oqaaseqarusunngitsoq nassuiaavoq.

Karsimik misissueqqissaarneq

Múte B. Egedep oqaatigaa, nunap aningaasaqarneranut karsip misissoqqissaarneqarnissaa pisariaqartoq, taaamaalilluni nunap aningaasaqarnikkut inissisimanera erseqqinnerusumik paasineqassammat.

- Karsimik misissueqqissaarnerup qanoq tupaallatsitsiginissaa maannakkorpiaq ilisimanngilarput, Naalakkersuisunut siulittaasunngorlaaq erseqqissaavoq. Taassuma peqatigitillugu oqaatigaa, ikiorsiissutinut qanoq aningaasartuuteqartigisoqassanersoq coronap tuniluunnerata nalorninartoqartikkaa.

Sermitsiaq.AG-p aningaasanut naalakkersuisunngortussaq Asii Chemnitz Narup aperisimavaa, naalakkersuisooqatigiinnissamut isumaqatigiissummi allassimasoq malillugu aningaasanut inatsisit sooq "nalilersoqqinneqarniarnersut".

Eqaannerusumik sulisoqartarnissaa pisariaqartoq

Apeqqut akineqanngilaq, Asii Chemnitz Narupillilli ilaatigut oqaatigaa:

- Karsimik misissueqqissaarneq apeqquterujussuuvoq. Aningaasat eqqortumik atorneqarsimappata, aamma uterteqqinneqarsinnaasunik isumautusaartumik aningaasaliissuteqartoqarsimappat, ukiumut ataatsimut aningaasanut inatsit amigartooruteqassagaluarpat tunngaviatigut ajoriffissaqartinngilara. Taamatulli oqareerlunga, aningaasanut inatsisit amigartoorfiusussatut inissinneqartarnissaat anguniagaanngilaq – naamerluinnaq. Ukiorpassuarnili politikkikkut aqutsisimaneq maanna qinersinikkut qaangertussanngorparput – maannalu nunap aningaasaqarnerata qanorpiaq inissisimanerata tamakkiisumik piviusorsiortumillu takuneqarnissaa piffissanngorpoq, misissuinermilu tassani eqaannerulaartumik sulisoqartarnissaa pisariaqartinneqarnersoq paasinarsiumaarpoq. Piffssap tamanna takutikkumaarpaa.