Múte Mette F-imik ataatsimeeqateqarniartoq.: Ataatsimiititaliaq nutaaq pilersinneqarniartoq
Naalakkersuisut Siulittaasuata sapaatip akunnerani matumani ministeriuneq ataatsimeeqatigissavaa, tassani ataatsimiititaliap nutaap, illersornissamut sillimaniarnermullu politikkikkut tunngassuteqartunut Kalaallit Nunaata Savalimmiullu pitsaanerusumik peqataatinneqartarnissaannik qulakkeerinnittussap pilersinneqarniarnerani suliassat kingulliit isumagineqassallutik.
Attaveqaqatigiittarnermut ataatsimiititaliap nutaap illersornissamut sillimaniarnermullu politikkimik qitiutitsisussap, assersuutigalugu sillimaniarnermut politikkimi, danskit akisussaaffigisaanni aalajangiisoqarniartillugu Kalaallit Nunaannik Savalimmiunillu pitsaanerusumik peqataatitsisarnissaq qulakkiissavaa.
Tamanna juunimi naalagaaffeqatigiit ataatsimeeqatigiinneranni isumaqatigiissutigineqarsimavoq.
Naalakkersuisut Siulittaasuata Múte B. Egedep (IA) Danmarkimi ministeriuneq Mette Frederiksen (Soc.) sapaatip akunnerani matumani kingusinnerusukkut ataatsimeeqatigissavaa, tassani attaveqaqatigiittarnermut ataatsimiititaliap pilersinneqarniarnerani suliassat kingulliit isumagineqassapput.
Múte B. Egede ataasinngornermi Inatsisartuni oqallittoqarmat taamatut ilisimatitsivoq.
- Sapaatip akunnerani matumani ministeriunermik ataatsimeeqateqarnermi ataatsimiititaliassamut, nunanut allanut, illersornissamut sillimaniarnermullu politikkimik ingerlatsinermi Kalaallit Nunaannik peqataatitsisartussamut tunngatillugu suliaq naammassissavarput, Múte B. Egede oqarpoq.
- Annertuumik alloriartoqarsimasoq
Naalagaaffeqatigiit ataatsimeeqatigiinneranni isumaqatigiissummut aamma ilaavoq, Kalaallit Nunaata Issittumi Siunnersuisoqatigiit ataatsimiinnerani siulliulluni oqaaseqartinneqartarnissaa, Múte B. Egedellu ataasinngormat oqaatiga, naalagaaffeqatigiit ataatsimeeqatigiinneranni angusarineqartut nunanut allanut politikkimi inissaqartinneqarnerulerneq eqqarsaatigalugu siuariartoqarsimasoq:
- Nunanut allanut politikki pineqartillugu periarfissavut killeqartarsimapput. Juunilli qulingani (naalagaaffeqatigiit ataatsimeeqatigiinneranni) annertuumik alloriarsimavugut, sulili anguniagarivarput Kalaallit Nunaata peqataatinneqarnerusarnissaa, aamma nammineernerulluta iliuuseqarsinnaasariaqarpugut, Múte B. Egede ataasinngormat Inatsisartuni taamatut oqarpoq.
Kalaallit Nunaanni sillimaniarnermut politikki piffissami kingullermi oqallisaasimaqaaq.
Sillimaniarnermut politikki oqallisaangaatsiartoq
Naalakkersuisut ilaatigut nunami maani sakkutuujusussaanermut Illersornissaqarfiup misilitsitsisarnera unitsissimavaat, nunanullu allanut naalakkersuisuusimasup Pele Brobergip (N) Folketingip Issittoq pilllugu illersuinissamut akuersissutigisimasaa milliardinik nalilik unitsissimavaa. Aningaasat ilaatigut droninut Issittumi nakkutilliinermi atorneqartussaagaluarput kiisalu Kangerlussuarmi illersornissamut ilinniartitsinermut atorneqartussaagaluarlutik.
Naalakkersuisunit taamatut nalunaaruteqarsimanerit Inatsisartut Nunanut allanut Sillimaniarnermullu Ataatsimiititaliaanit tupigusuutigineqarsimapput. Múte B. Egedep namminerluni ataasinngormat nunanut allanut oqartussaaffik Pele Brobergimiit tiguaa, ataatsimiititaliallu peqataatinneqarnerunissaa Inatsisartut ataatsimiinneranni oqaatigalugu:
- Nunanut allanut Sillimaniarnermullu Ataatsimiititaliaq qaaqqorusuppara, ataatsimoorussamik nunanut allanut polikkeqarnerup qanoq qulakkeerneqarnissaa oqaluuseriniarlugu, Naalakkersuisut Siulittaasuat oqarpoq.