Múte isumalioqatigiissitami ingerlanerluttoqarmat ataatsimiititaliamik ataatsimeeqateqarniarpoq
Naalakkersuisut Siulittaasuat Tunngaviusumik Inatsisissaq pillugu Isumalioqatigiissitamut tunngatillugu ataatsimiititaliamik tallimanngornermi ataatsimeeqateqarniarpoq. Isumalioqatigiissitami sorpiaat ajornartorsiutaanersut suli ilisimatitsissutigerusunngilai.
Sapaatip-akunnerani matumani siusinnerusukkut saqqummiunneqarpoq, Tunngaviusumik Inatsissaq pillugu Isumalioqatigiissitami suleqatigiinniarneq ajornartorsiutaasoq, ajornartorsiuteqarnerullu malitsigisaanik Kuupik V. Kleist qaammatit pingasut sinnilaarlugit siulittaasooreerluni siulittaasutut tunuartoq.
Naalakkersuisut Siulittaasuata Múte B. Egedep (IA) aamma oqaatigisimavaa "isumalioqatigiissitap sulinerata ingerlanera pilersaarut malillugu ingerlasimanngitsoq."
Sermitsiaq.AG-mit tassunga atatillugu Naalakkersuisut Siulittaasuat apersorusunneqarsimavoq, isumalioqatigiissitami sorpiaat ajornartorsiutaanersut itisilertikkusullugit, Naalakkersuisulli Siulittaausata sorpiaat ajornartorsiutaanersut saqqummiukkusunngikkallarpai, siulittaasoq allakkatigut akissuteqarluni taamatut ilisimatitsisimavoq:
- Isumalioqatigiissimami unammilligassat unammilligassaasimasullu pillugit maannakkorpiaq itisiliillunga oqaaseqarsinnaanngilanga. Ataatsimiititaliaq Tunngaviusumik Inatsisissaq pillugu Isumalioqatigiissitamut tunngatillugu tallimanngorpat ataatsimeeqatiserisimavara, tusagassiorfitsigullu nalunaauteqartinnanga patiit siulittaasui ataatsimeeqatigeqqinniarpakka, Múte B. Egede oqarpoq.
AAMMA ATUARUK: Partii isummaminik allannguisoq: Inatsit tunngaviusussaq pillugu Isumalioqatigiissitap atorunnaarsinneqarnissaanut taaseqataasoq
Isumalioqatigiissitami suleqatigiinniarnermik ajornartorsiuteqartoqarnerata saniatigut, siulittaasuusimasup Kuupik V. Kleistip aamma oqaatigisimavaa, isumalioqatigiissitap allattoqarfiani sulisut paarlakaatingaatsiarsimasut, allattoqarfimmilu maanna sivisunerpaamik sulisimasoq ukiumi ataatsimi sulisimalluni, kiisalu isumalioqatigiissitami politikkerit ilaasortaasut paarlakaatingaatsiarsimallutik.
Tunngaviusumik Inatsisissaq pillugu Isumalioqatigiissitamut ukioq manna fem millioner koruunit sinnerlugit aningaasaliissuteqartoqarsimavoq, pilersaarullu malillugu Kalaallit Nunaata namminersulivinnissaanut inatsimmut tunngaviusussamut missingiut isumalioqatigiissitap ukioq manna tunniuttussaagaluarpaa.
Inatsisartuni marlunngornermi oqallittoqarmat saqqummiunneqarpoq, isumalioqatigiissitaq suliaminik naammassinninniarluni, missingiummik tunniussinissaq ukiup affaanik sivitsorneqarnissaanik qinnuteqarsimasoq.