Skip to main content

Múte iliuuseqaqqusisoq: Aningaasarsiornikkut ingerlalluarneq asuliinnartinneqarpoq

IA-mi siulittaasoq Múte B. Egede atugarissaarnermut tunngatillugu anguniagassanik arfineq-marlunnik saqqummiussivoq, Kalaallit Nunaata aningaasaqarnikkut imminut napatinnissaanik qulakkeerisussanik atugarissaarnermullu tunngatillugu attanneqarsinnaasumik pilersaaruteqartoqarnissaanik qulakkeerisussamik

Múte B. Egede Aviisimi Sermitsiami atugarissaarnermut tunngatillugu anguniagassanik arfineq-marlunnik allaaserisaqarpoq. Múte isumaqarpoq takusassiatut siunnersuusiortarneq sunniiniarlunilu politikkeqartarneq unitsinneqartariaqartoq.

- Ukiarmi akitsuutinik qaffaanerit takutippaat Naalakkersuisuit aningaasaqarnermik aqutsisinnaannginnerup saniatigut itinerusumik ajornartorsiuteqartut, partiimi siulittaasoq tusagassiorfinnut nalunaaruteqarluni allappoq.

Taanna aamma isumaqarpoq, ukiuni kingullerni aningaasaqarnikkut ingerlalluartoqarnerani attanneqarsinnaasunik nammanneqarsinnaasumillu napatinneqarsinnaasunik aaqqiissutissanut aningaasaliissuteqartoqarsimanngitsoq.

Atugariissaarneq kinguussaajartortoq

- Atugarissaarnerput kinguussaajartorpoq, nunarsuarmilu aningaasaqarneq annikikkaluamilluunniit ajorseriassagaluarpat, siunissami iliuuseqarnissamut periarfissarpassuavut ajalusoorsinnaapput. Taamaammat Naalakkersuisunut Inatsisartunilu ilaasortanut tamanut kaammattuutigaara, tullianik katersuunnitsinni allatut iliuuseqartoqartariaqartoq, partiit illuatungiliuttut annersaanni siulittaasoq erseqqissaavoq.

- Tamanna uagutsinnut aamma isornartorsiuineruvoq. Inuit Ataqatigiinni aaqqiissutissanik tigussaasunik, tamanut pitsaanerusumik kingunqartitsisinnaasunik tikkuussisarnissaq pikorinneruffigisariaqarparput. Ataatsimiititaliarsuit, naassaanngitsumik assortuuttarnerit sunniiniarlunilu politikkeqartarneq partiini tamani unitsinneqartariaqarput. Ukiuni aningaasaqarnikkut ingerlalluarfiusuni innuttaasunut malunnaatilimmik pitsanngorsaasoqarsimannginnera ernummatigilluinnarpara, Múte erseqqissaavoq.

Atugarissaarnermut tunngatillugu anguniagassat arfineq-marluk

Múte B. Egedep atugarissaarnermut tunngatillugu anguniagasat arfineq-marluk taakku saqqummiussani aqqutigalugi neriuutigaa, kommunit inuussutissarsiortullu peqataatillugit politikkikut aaqqiissutissarsiorniarluni piumassuseqartoqassasoq:

Utoqqaat atugaannik pitsanngorsaanissamut 2030-p tungaanut ataatsimoortumik pilersaarusiortoqassasoq.

Meeqqanik atornerluisarnerup sumiginnaasarnerullu akiorneqarnissaanut nuna tamakkerlugu iliuusissatut pilersaarutip atuutsinneqalernissaa.

Ilinniagaqartarnerup qaffasissusaata pitsanngorsaaffigineqarnissaanut ataatsimoortumik pilersaarusiortoqassasoq kiisalu pisariaqartitat 2030-p tungaanut naleqqussarneqassasut.

Suliffissaqartitsinerup qanoq annertusarneqarsinnaaneranut isumaginninnikkullu pissarsisartut qanoq ikilisarneqarsinnaanerannut ataatsimoortumik pilersaarusiortoqassasoq. Taamaalilluta pisariaqartitsinerpaat ikiortuarniassagatsigit.

Innuttaasut peqqissuunissaannut peqqinnissaqarfiullu ullutsinnut naleqquttuutinnissaanut ataatsimoortumik pilersaarusiortoqassasoq.

Inuusuttut ullumikkut ilinniagaqanngitsut suliffeqanngitsulluunniit pillugit 2023-p tungaanut ataatsimoortumik pilersaarusiortoqassasoq.

Ineqarniarnikkut ajornartorsiutit aaqqiiffigineqassasut, kikkullu tamarmik ineqalernissaat anguniarlugu 2030-p tungaanut pilersaarusiortoqassasoq.

Mútep nassuerutigaa, ajornartorsiutinut taama amerlatigisunut annertutigisunullu IA akissuteqaranilu inaarutaasumik aaqqissutissanut akissutissaqanngitsoq.

- Aningaasarsiornikkulli ingerlalluarnerup asuliinnartinneqarsimanera isiginnaaginnarsinnaanngilarput. Taamaallu aningaasaqarneq ajorsiartoqqilissaaq, taamaalippallu ingerlalluartoqarnerani pisariaqartinneqartunik iliuuseqarsimannginnerput kingunerluuteqassalluni. Taamaalisoqarpat Kalaallit Nunaanni innuttaasut naalakkersuisullu sakkortuumik eqqugaassapput, Múte siulittuivoq.

Neriuutissaarunneq

Siorna ukiakkut ataatsimiinnermi, Naalakkersuisut Demokraatit peqatigalugit nioqqutissat arlallit akitsuutaannik innuttaasunit akerlerineqaqisumik qaffaanerat isorilluinnarpaa.

- Ataatsimut isigalugit isumaqarpunga, akitsuutinik qaffaanerup sukkutortakkatta, imigassartortakkatta cigaritsitortakkattalu akiisigut eqqugaanginnanngitsugut. Akitsuutinik qaffaanerit takutippaat Naalakkersuisut unittooqqasut neriuutissaarussimasullu. Taamaammat innuttaasut akerliussutsimik takutitsinerat, imatut paasivara – qisuariarnerat – ajunngitsuusoq: Naalakkersuisooqatigiit nukissaarussimanerat erseqqissumik takunneqarpoq. Nukiillu nutaat sassartariaqarlutik.

Aviisi Sermitsiaq pissarsiariuk, allaaserisarlu tamaat atuarlugu – ugguuna iserfigisinnaavat:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER