Danmarkimi nutaanik naalakkersuisoqalerpoq, nutaamik naalakkersuinermi tunngavissaqalerpoq nutaanillu ministereqalerluni. Naalagaaffeqatigiinnili suleqatigiinnissamut siunnerfik ingerlatiinnarneqassasoq, Naalakkersuisut Siulittaasuata Múte B. Egedep (IA) Sermitsiaq.AG-mut tamanna erseqqissaassutigaa.

Matumani aamma Danmarkimi nunanut allanut tunngasutigut ministerinngortumut Lars  Lække Rasmussenimut, kingoraakkaminit Jeppe Kofodimit oqaatsinik allaanerusunik atuisartumut atuuppoq.

- Løøke oqaatsinik allaanerusunik atuisarpoq, nunanulli allanut tunngasutigut politikkimi oqaatsit atortakkavut aamma inissaqartinneqarnerunissamik piumasaqaativut kiisalu nunani tamalaani iliuuserisassavut suli taakkuupput. Tamanna kinaluunniit ministeriugaluarpat allanngortinneqassanngilaq.

Uagut pineqartilluta avaqqunneqartassanngilagut

Naalakkersuisooqatigiinnissamut tunngavissami Naalagaaffeqatigiinnut tunngassuteqartut pitsaasutut isigai.

- Isumaqatigiissummi Kalaallit Nunaat pineqartillugu Kalaallit Nunaata avaqqunneqartannginnissaanik oqaaseqartuarsimanerput ilaatinneqarpoq.

Akerlianilli aamma naalakkersuisooqatigiinnissamik tunngavisami neriorsuutigisimasat akerliannik aallartittoqareersimavoq, siulittaasoq oqarpoq.

- Illersornissamut tunngatillugu aamma Issittumi susoqarniarnersoq pillugit allassimasoqangaatsiarpoq. Tamanna nuannarinngilara, uagummi avaqqutiinnarluta tamanna Københavnimiit aalajangiiffigineqarsinnaanngilaq. Ministeriuneq maannamut pitsaasumik kinguneqartussanillu suleqatigisimavara, kissaatigaaralu siunnerfigineqarsimasoq ingerlatiinnarneqassasoq.

Illersornissamut isumaqatigiissutissaq suliarineqangajalersoq

Naalakkersuisooqatigiinnissamik isumaqatigiissummi ilaatigut allassimavoq, Danmarkimit NATO-mut bnp-p to procentianik akiuliuteqartarnissaq 2030-mi atuutsinneqalissasoq, ukioq manna siusinnerusukkut tamatuma 2033-mi atuutsinneqalernissaa isumaqatigiissutaasimagaluartoq. 

Taamaammat illersornissamut isumaqatigiissutissaq nutaaq isumaqatiginninniutigineqalerpat Naalakkersuisunit tamakkiisumik malinnaassaagut.

- Isumaqatiginninniarnerni taakkunani avaqqunneqassanngilagut, naatsorsuutigaaralu siusinnerusukkut isumaqatigiissutaasimasoq malillugu isumaqatiginninniarnernut peqataatinneqartarnissarput malinneqassasoq. Taamaattoqanngippammi Issittumi piginnaasanik annertusaanissaq pillugu isumaqatigiissuteqartoqarsimaneratulli inissisimalissaagut, tassa avaqqulluta isumaqatigiissuteqartoqarsimammat isumaqatigiissummi aaqqiissuteqartariaqartoqarnikuummat, Múte B. Egede oqarpoq. 

Susassaqarfiit arlallit nunatsinnit aqunneqassasut

Naalakkersuisooqatigiinnissamik isumaqatigiissummi aamma allassimavoq, naalagaaffiup Kalaallit Nunaanni suliassaasa qanoq Kalaallit Nunaanniit aqunneqarsinnaaneri pillugi nassuiaasiortoqassasoq.

- Taamatut ingerlasoqarnissaa pissusissamisuussaaq, maannali nassuiaasiortoqartussaavoq, imaanngilarli taakku malinneqassasut. Taamaammat pissanngatigaara naalakkersuisunngortut atatsimeeqatigilerutsigit tassunga atatillugu qanoq isumaqarnerannik tusagaqarnissara.