Mùte danskit ministeriinik naammaginninngitsoq

Suliani arlalinni Kalaallit Nunaat akuutinneqarsimanngitsoq, Naalakkersuisut Siulittaasuat oqarpoq. Tamanna sapaatip-akunnerani matumani danskit ministeriinik arlalinnik ataatsimeeqateqarnermi uparuarneqarpoq. Ministeeriaqarfimmit ilisimatitsissutigineqarpoq, oqallinnissani aggersuni Kalaallit Nunaat akuutinneqassasoq.

Múte B. Egede sapaatip-akunnerani matumani Danmarkiippoq, nunanut allanut illersornissamullu ministerinik ataatsimeeqateqarniarluni kiisalu meeqqat misileraataasimasut pillugit Mette Frederiksen peqatigalugu aaqqissuussamut peqataaniarluni.

Ministeriunerup Mette Frederiksenip sillimaniarnermi nunanullu allanut politikkimi pissutsinut pingaarutilinnut Kalaallit Nunaata akuutinneqartarnissaanik isumaqatigiissut malissimanngilaa, taamatut isumaqarpoq Naalakkersuisut Siulittaasuat Múte B. Egede.

Siulittaasup aalassassimaarutigaa, ministeriunerup sapaatiummat danskit illersornissaqarfiannik kivitsiniarneq pillugu saqqummiussigami, Kalaallit Nunaannik peqataatitsinnginnera.

- Sapaatiummat tusagassiortunik katersortitsisoqarmat Issittoq arlaleriarluni oqaatigineqarpoq, "uagullu peqataatinnata uagut pilluta oqallittoqartannginnissaanik" tunngavigisatsinnut tamanna akerliulluinnarpoq, Múte B. Egede Sermitsiaq.AG-mut itisiliilluni oqarpoq, nangillunilu:

- Attaveqartarnermut Ataatsimiititaliamik pilersitsinermi tamanna isumaqatigiissutaagaluarpoq. Tassani isumaqatigiissutaavoq, ataatsimut tunngaveqartoqassasoq, tamatta immikkut sumiiffitsinniit tunngaveqarluta immitsinnut peqataatillutalu ilisimatitsissuteqartarnissarput. Tamannalu matumani pisimanngilaq.

Múte B. Egede ulluni makkunani Danmarkimiippoq, marlunngornermi danskit illersornissamut ministeriat nunanullu allanut ministeriat ataatsimeeqatigai, tassanilu peqataatinneqarsimannginneq oqaluuserineqarluni:

- Tusarniaaffigineqaannartarusunngilagut, attaveqartarnermulli ataatsimiititaliamik pilersitsinermi pilersaarutaasutut suliaqarnermut peqataatinneqarusuppugut. Tamanna illersonissamut ministerimik nunanullu allanut ministerimik ataatsimeeqateqarninni oqaatigaara, Múte B. Egede Sermitsiaq.AG-mut oqarpoq.

- Suliaq ataasiinnaanngitsoq

Siulittaasup oqaatigaa, illersornissaqarfiup kivinneqarnissaa pillugu suliami taamaallaat Kalaallit Nunaat akuutinneqarsimanngitsoq:

- Suliami tassani taamaallaat akuutinneqanngilagut. Sulianut arlalinnut atatillugit Naalakkersuisuni isumaqarpugut, Danmarki isumaqatigiissutinik malinnittanngitsoq.

Apeqqut: Suliat sorliit pineqarnersut pillugit oqaluttuussinnaavinga?

- Oqaatigissavara, susassaqarfiit arlallit pillugit suliani nalinginnaasuni arlalinni Kunngeqarfiup Issittoq pillugu oqaluuserinnittarneranut akuutinneqartarsimanngilagut, suliallu avaqqulluta suliarineqartarsimallutik. Tassani illersornissamut atatillugu nalunaarummut assigusut pineqarput, Múte B. Egede oqarpoq, nangillunilu:

- Akuutinneqarsimanngilaut, tamannalu arlaannaataluunniit nuannarinngilaa. Marlunngornermi ataatsimeeqatigiinnitsinni soorlu oqaatigisimaginga: EU-p politikkia Danmarki avaqqullugu oqaluuserisanngilarput. Issittoq pillugu oqaluuserinnittoqassappat, Kalaallit Nunaat akuutinneqartariaqarpoq.

Ministeeriqarfik: Kalaallit Nunaat peqataatinneqassaaq

Isumaqatigiissut Mette Frederiksenip sapaatiummat saqqummiussaa naapertorlugu, illersornissaqarfimmut aningaasaliissutit 2022-p 2023-llu ingerlaneranni katillugit syv milliarder koruuninik ilaneqarniarput. Illersornissaqarfimmullu aningaasaliissutit 2024-miit 2033-p tungaanut Danmarkip BBP-iata to procentiinik ilaneqartassallutik.

Múte B. Egedep isornartorsiutaanik Illersornissamut ministeeriaqarfik saqqummiussiffigineqarami Sermitsiaq.AG-mut ilisimatitsissutigaa:

- Danmarkimi naalakkersuisut, Venstre, SF, Radikale Venstre aamma Det Konservative Folkeparti isumaqatigiissuteqarsimapput, tassani Illersornissaqarfimmut aningaasatigut atugassarititaasut isumaqatigiissutigineqarlutik.

- Kalaallit Nunaat Savalimmiullu illersornissamut atatillugu isumaqatigiissusiornissamut soorunami peqataatinneqassapput, Illersornissamut ministeeriaqarfik allakkatigut naatsumik ilisimatitsissuteqarluni allappoq.

Sermitsiaq.AG-mit Múte B. Egede pingasunngornermi aperineqarpoq, Danmarkimi ataatsimeeqateqarnermini aningaasat ilaat Kalaallit Nunaanni Savalimmiunilu atornearniarnersut paasisaqarfigisimaneraa:

- Oqaatigissavara, illersornissamut aningaasaliissutinik taamatut ilasineq aamma illersonissamut nangaassuteqarnermik taasisitsineq soorunami sunniuteqartussaapput. Isumaqatiginninniarnermut peqataassaagut sunniuteqaqataallutalu, Naalakkersuisut Siulittaasuat oqarpoq.

Powered by Labrador CMS