Múte coronamik tunillatsissimasoq
Naalakkersuisut Siulittaasuat Múte. B. Egede coronamik tunillatsissimavoq. Naalakkersuisut Siulittaasuat Facebookikkut taamatut allappoq. Siulittaasoq maannakkorpiaq Danmarkimiippoq.
Nunami naalakkersuisut siulittaasuat, nunami innuttaasorpassuit allat assigalugit coronamik tunillatsissimavoq. Múte B. Egede Danmarkimiippoq ataqqinartorsuup Dronningip nalliuttorsiutigineqarnissaanut peqataajartorluni aamma ilaatigut ministeriunermik Mette Frederiksenimik ataatsimeeqateqariartorluni.
Facebookikkt ilanngutassiami, inunnit 200-nik amerlanerusunit oqaaseqarfigineqareersimasumi tamanna atuarneqarsinnaavoq.
- Ullumikkumiit angalaninni ataatsimiinnissaraluakka tamaasa kinguartittariaqalerpakka coronamik tunillatsissimanera patsisigalugu.
Maanna peqqiilliukujukkaluarlunga perulunngilanga.
Tamassi ajunnginnerpaamik kissaappassi - Ullugissaarisi, naatsumik nalunaaruteqarluni taamatut allappoq.
Namminersorlutik Oqartussani attaveqartarnermut pisortap Facebookikkut ilanngussaq innersuussutigaa, pisorlu pillugu allanik paasissutissaateqannginnerarluni.
Namminersorlutik Oqartussat tusagassiorfinnut naatsumik nalunaaruteqarlutik ilisimatitsissutigaat:
- Múte Bourup Egede ulluni makkunani Danmarkimiippoq ilaatigut statsminister Mette Frederiksen ataatsimeeqatigisussaagamiuk. Aammattaaq pilersaarutaangaluarpoq Dronning Margrethep ukiuni 50-ni Dronningiuneranut atatillugu nalliuttorsiorneranut peqataanissaq kiisalu nunani assigiinngitsuni aallartitanik ataatsimeeqateqarnissaq. Ataatsimiinnissaraluit peqqissinissaanut kinguartinneqarput.