Múte Bourup Egede: Matoqqasumik aqutsineq unitsinneqarli
Inuit Ataqatigiit siulittaasuat, Múte Bourup Egede Inatsisartut upernaakkut ataatsimiinneranni aalajangiiffigisassatut siunnersuummik saqqummiussaqarpoq Naalakkersuisut ammanerusumik tusarniaariaaseqalissasut. Naalakkersuisut neriorsuuteqarput akunnerminni avammullu tusarniaasarnerminni periusertik tamanut saqqummiunneqassasoq, maannamulli tamanna naammassineqanngilaq.
Innuttaasut tassaaginnanngillat qinersinermikkut politikkikkut partiit arlaannut pissaanermik tunniussisartut kingornalu puiguinnarneqartussat. Innuttaasummi tassaapput inuiaqatigiit inerisarneqarneranni peqataasussat, tusaaneqarnissaminnut periarfissaat annertunerulersinneqartariaqarpoq, aammalu inuiaqatigiinni oqallittariaaseq qaffassarneqartariaqarpoq ammasumik isertuaatsumillu politikkikkut aqutseriaaseqarneq aqqutigalugu. Taamak isumaqarpoq Inuit Ataqatigiit siulittaasuat, Múte Bourup Egede, tamannalu pillugu Inatsisartut upernaakkut ataatsimiinneranni aalajangiiffigisassatut siunnersuuteqarpoq (UPA2019 imm. 109). Siunnersuut Inatsisartunit Naalakkersuisunillu ilalerneqarpoq.
Naalakkersuisut neriorsuuteqarput, tusarniaanerni periutsit tamanut takussutissianngorlugit saqqummiunneqassasut, taamaalillutik innuttaasut, kattuffiit aammalu allat soqutigisaqartut siunissami qularissanngimmassuk tusarniaanerni periutsit qanoq ittuunersut, tusarniaanerimmi pingaaruteqarluinnartut ingerlanneqartarnerini kikkut tamarmik tusarniaassutigineqartumut soqutigisaqarsinnaasut qularuteqaratik periarfissatik ilisimalluarlugit pineqartumut sunniuteqaqataasinnaanerat qulakkeerneqarsinnaassammat.
– Inuiaqatigiit ingerlalluartut ilisimasaqassutsikkut qaffasissumik inissisimasussaapput, aammalu innuttaasut peqataallutillu ilusilersueqataanissaminnut periarfissarissaartussaapput, tamannalu ilaatigut qulakkeerneqarsimasussaaavoq tusarniaanerit aqqutigalugit sunniuteqaqataanikkut, tassa aalajangiinerit sioqqullugit aalajangersarniakkat pillugit soqutigisaqartut piffissaqarluarlutik aammalu periarfissaqarluarlutik pineqartoq pillugu ilisimasaqarlualernissaminnut periarfissaqartariaqarput, taamaattorli aamma ammasumik minnerunngitsumillu tusagassiuutinik suleqateqarluarluni aqutsinermi ingerlatsisoqartariaqarpoq. Taamaammat siunnersuutinni piumasaraara minnerpaamik Naalakkersuisut tusarniaasarnerminni periutsitik tamanut saqqummiutissagaat, tamannalu Inatsisartunit Naalakkersuisunillu ilalerneqarpoq. Maanna qaammat juli ingerlallualaalereerpoq, inatsisinillu atuutsitsinermut ataatsimiititaliap isumaliutissiissutaa 24. maj naammassineqarpoq tamanullu takusassiarineqarluni, taamaakkaluartoq maannamut Naalakkersuisut neriorsuutertik naammassinngilaat, Múte Bourup Egede tikkuaavoq.
Matoqqasumik ingerlatsineq eqqoriaalluni oqallinnernik pilersitsisarpoq
Bourup Egede isumaqarpoq, matoqqalluinnartutut oqaatigineqartariaqartumik aqutseriaaseqarneq Naalakkersuisut siulittaasuata siuttuuffigisaanik ingerlanneqartillugu, innuttaasut akornanni tigussaasumik tunngaveqarani oqallinnerit ingerlanneqalersartut, taamaammallu amerlasuutigut oqallinnerit eqqoriaanermik tunngaveqalersartut, ajornerpaamillu pisoqaraangat inuttarsiuilluni oqallinnerit allaat ingerlanneqalersinnaasarlutik, naak massa oqallisigisassat inuiaqatigiinnut inuiaqatigiillu ineriartornissaannut pingaaruteqarluinnaraluartut.
Allaaserisaq tamakkerlugu aviisimi Sermitsiami saqqummeqqammersumi atuarsinnaavat, allaaserisamilu atuarsinnaavat IA-p siulittaasuata aqutsineq ammanerusoq qanoq ittoq ujartorneraa. Aviisi uani ataani pissarsiarisinnaavat: