Múte Bourup Egede: Aningaasanut inatsisissaq allanngortiterneqartariaqarpoq
Nunatsinni partiit illuatungiliuttut annersaata kissaatigaa, partii inatsimmut akuerseqataassappat aningaasanut inatsisissaq 2021-moortoq oqimaaqatigiissasoq.
Aningaasanut inatsisissaq 2021-moortoq oqimaaqatigiissoq IA-p taaseqataaffigissallugu kissaatigaa.
Aviisi Sermitsiaq taama allappoq.
Taamaattorli Inuit Ataqatigiit siulittaasuata, Múte Bourup Egede-p erseqqissaatigaa aningaasanut inatsisissaq pillugu isumaqatigiinniarnissamut ammallutik, inuiaqatigiinnut naapertuuttumik aningaasaqarnikkut aqutsinissaq pillugu paaseqatigiittoqarsinnaappat namminneq peqataaffigisinnaasaminnik, taava aamma siumoortumik itigartitsivikkusugatik:
- Aallarniutaasumik oqaloqatigiinnissat pissangalluta utaqqivagut, ataatsimoorussatsinnimmi piumassuseqarutta aaqqiisoqarsinnaasoq periarfissaasoraarput. Siunnersuutillu saqqummiussagut allatut isumaqarfigineqarsinnaammata, isummat periarfissallu allat tusarnissaat suleqatiginnikkusussusermillu Naalakkersuisooqatigiit ilumut piumassuseqassanersut takunissaat qilanaaraarput, Múte Bourup Egede (IA) Sermitsiamut oqarpoq.
Kingulissavut akiligassalersorneqassanngillat
Taamaattorli amigartoortumik ingerlatsisoqarnissaanik naalakkersuisooqatigiinnit siunnerfeqartoqarnera IA-p assut isumakulunnartikkaa Bourup Egede erseqqissaateqarpoq:
- Ullumikkutut ingerlaaseq aaqqissuusseqqiffiginagu pissutsit taamaaginnaarnissaat kiisalu amigartoornerup kingulissatsinnut akiligassanngortinnissaa aningaasarliornittalu nunatta avataaniit attartornikkut isumalluuteqarluni matussuserniaannarneqarnera peqataaffigiuminaatsikkatsigu maannangaaq erseqqissaatigissavara, Múte Bourup Egede (IA) oqarpoq.
Aviisimi Sermitsiami atuarnerusinnaavutit: