mittarfiit

Muté Borup Egede-p Kangerlussuarmut tunngatillugu 'akiusinnaasut' ilimuunnginnerarpai

Kangerlussuup mittarfiata nutarterneqarnissaanut 1,5 milliardinik immikkoortitsineq eqqoriaanerinnaanngitsoq, Attaveqatigiinnermut Naalakkersuisup Muté Borup Egede-p oqaatigaa

2015-p aasaanerani akinik qaffaarujussuartoqarnera oqartussanit paasineqarpoq.

Kangerlussuarmi mittarfiup nutarsarneqarnissaanut 250 mio koruunit immikkoortinneqaqqaarput kingornatigulli 500 mio koruuninik qaffanneqarluni kingornatigulli katillugit 1,5 milliardi koruuninut naleqalerluni.

Qeqqata Kommuniani ingerlatsiveqarfiup Naalakkersuisoqarfik ''akiusinnaasumik' oqariartuuteqartoq Sermitsiaq.AG-p allaaserinneqqammerpoq.

Atuaruk: Kommuni: Kangerlussuarmi nutarsarneqarnissaanut Naalakkersuisuit akinik ilumuunngitsunik taakkartuipput

Ingasattumik naliliineq

Tamannalu Naalakkersuisup Muté Borup Egede-p (IA) ilumuunnginnerarpaa. Muté Borup Egede, Sermitsiaq.AG-mit apersorneqarnissaminut piffissaqannginnami mittarfiup nutarterneqarnissaanut 1,5 milliardinik naliliineq ingasattajaarnerarlugu allappoq.

- 2015-mi Kangerlussuarmi mittarfiup nutarterneqarnissaanut naliliisimaneq annertuallaarnera pissutigalugu marlunnik nalunaarusiortitsisoqarpoq, Muté allappoq.

Annertuumillu naliliineq mittarfimmik nutarterinnarmiinnginnerarpaa.

- Suliarlu pillugu innaallagissamik pilersuinermut, ineqarnermut sanaartornissamut ilaallu ilanngullugit aningaasaliisoqaqqinnissaa pisariaqarsimasoq, Muté Borup Egede-p erseqqissaatigaa.

Missingersuutit takkutissapput

Qeqqata Kommuniata 1,5 milliardinik naliliisimanera eqqoriaanerinnaasoq, Muté Bourp Egede-p (IA) oqaatigaa.

- Erseqqissaatigerusuppara 'akiusinnaasumik' allamik soqanngimmat. Annertuallaamillu naliisoqarsimanera pissutaalluni erseqqissumik oqaatigineqarsinnaanngitsoq oqaatigaa.

Nutarterinermilu aningaasat qanoq amerlatigisut Qeqqata Kommunia kommunalbestyrelsip misissorneqarnissaa piumasarisimavaa.

Saqqummissaqqaarpoq, Attaveqatigiinnermut Naalakkersuisoq oqarpoq.

- Assersuutigalugu oqaatigisinnaavara 2015 ingerlanerani mittarfik misissorneqarsimavoq, 2016-milu misissuinerit allat ilaatigut qillerinnermik misileraanerit ingerlanneqarsimallutik. Inerniliinerillu tamaasa katerserpagut.

Inerniliinerit naammassippata mittarfiup nutarterneqarneranut aningaasat qasserpiaat atorneqassanersut paasinarsiumaarpoq. 250 mio imaluunniit 1,5 milliardiunersut paasinarsiumaarpoq.

Kommuni oqaloqatigineqarpoq

Qeqqata Kommuniani kommunalbestyrelse februarip qaammataani mittarfimmut suliap pilersaarusionera piumasaqaatigimmasakku politikerit atorfillillu malunnartumik malinnaatinneqarluarsimannginnertik pakatsissutigaat.

Kommunilu peqataatinneqartoq, Muté Bourup Egede-p (IA) oqaatigaa.

- Allaffissornikkut oqaloqatigiinneq aallartereernikuuvoq, kommunilu paasissutissanik annertunerusunik nalunaarusianik pissarsisartoq oqaatigalugu.

Powered by Labrador CMS