Múte B. Egede: Suliakkiissut upernaamut naammaassissasoq naatsorsuutigineqarpoq
Sorsunnersuarmit kingullermi Kalaallit Nunaata Danmarkillu akornanni pisartunik oqaluttuarisaaneq pillugu qulaajaaneq piaarnerpaamik suliarineqassaaq, Múte B. Egede oqarpoq, upernaap ingerlanerani naammassinissaa taassuma naatsorsuutigaa.
Danmarkip Kalaallit Nunaatalu akornanni oqaluttuarisaanermi pisunik qulaajaaneq kingusinnerpaamik oktobarimi 2022-mi piareersimasussaagaluarpoq. Ilisimaneqareersutullu folketingimut qinersisoqarnera aamma Danmarkimi naalakkersuisunik pilersitsineq pissutigalugit kinguartinneqarnikuuvoq.
Naalakkersuisut siulittaasuat Múte Bourup Egede, pingasunngormat ministeriuneq Mette Frederiksen oqaloqatigaa, suliap nanginneqarnissaa tassani isumaqatigiissutigaat.
- Qulaajaasut maanna piaartumik inissinneqassapput, tamanullu saqqummiunneqarnissaa pingaaruteqarluinnarpoq, taamaalilluni piffissap ingerlanerani pisut aamma qulaajaasut suleriaasaat takuneqarsinnaassaaq, taanna oqarpoq.
Nassuiaat upernaap ingerlanerani piariissasoq, Naalakkersuisut siulittaasuata naatsorsuutigalugu oqaatigaa, kingusinnerpaamik aasamut.
Qulaajaanermut naatsorsuutit
Taanna nangilluni oqarpoq:
- Piaartumik suliarisariaqarlugu uagut (ministeriuneq Mette Frederiksenilu, aaqq.) ullumikkut isumaqatigiippugut, suliap folketingimut qinersisoqarnissaa sioqqullugu ingerlareernikuummat.
Sorsunnersuaq kingullermiilli Kalaallit Nunaata qanoq pineqartarsimanera pillugu qulaajarneqarnissaat taassuma neriuutigaa, Múte Bourup Egedelu oqarnera naapertorlugu kalaallit ingerlariaqqinnissaannut tunngaviliissaaq.
Taassuma oqaluttuarisaaneq pillugu qulaajaanermut tunngatillugu nammineq naatsorsuutini makku oqaatigai:
- Nutaanik saqqummertoqassappat tamat ilisimanngisaannik arlaannik pisoqarsimanersoq qulaajarneqarnissaa. Ukiumi kingullermi tamanna spiralilersuisoqarsimaneranut tunngatillugu takuarput, tassani akuersaarneqarsinnaanngitsunik pisoqarsimasoq paasivarput.
- Spiralilersuisoqarneranik suliaq ilaatigut qulaajarluarneqassaaq, taanna oqarpoq.