Múte B. Egede: Ammariartuaarnissamut siullermik alloriarpugut
Naalakkersuisut Inatsisartunilu partiit nunatta 31. december 2021 tungaanut ammariartuaarnissamut isumaqatigiissuteqarput. Qanermut assiaqutit, katersuussinnaanerit angallannermilu killilersuutit Sisimiuni suli atuukkallassapput, Upernavimmili Aasiannilu atuukkunnaarlutik.
Naalakkersuisut Inatsisartuni partiit peqatigalugit nunatta ammariartuaarnissaanut isumaqatigiissuteqarput. Ammariartuaarneq 31. december 2021 tungaanut ingerlanneqassaaq.
Naalakkersuisut siulittaasuata, Múte B. Egede (IA), peqqissutsimut Naalakkersuisup, Kirsten L. Fencker aamma nakorsaanerup Henrik L. Hansenip nunatta ammariartuaarnissaanut pilersaarut, nunatsinnilu coronavirusip tuniluunnerata killiffia killilersuutillu pillugit tusagassiortunik katersortitsinermi ullumi saqqummiuppaat.
Naalakkersuisut partiillu maanna isumaqatigiipput avataanit nunatsinnut tikissinnaasut amerliartuaartinneqalissasut, tikinnginnermili misissorteqqaartarnissaq suli piumasaqaataassaaq.
Ammariartuaarnissamut isumaqatigiissut:
- Nunatsinnut tikissinnaasut 1000-init 1500-nut ataasinngorpamiit amerlineqassapput
- Maanna Islandimiit nunatsinnut tikissinnaasut sapaatip akunneranut 180-iupput
- 1. oktober aallarnerfigalugu avataanit tikittut amerlassusaat killilersorneqarunnaassaaq
- Nunatsinnut tikinnginnermi misissorteqqaarnissaq suli piumasaqaataassaaq - ataasinngorpamiit misissortissimaneq 72 tiiminik qaangiisimassanngilaq
- Nunatsinni najugaqartut avataaniit tikittut akiuussutissalertissimanngikkunik angerlarsimaqqaarnissamik misissorteqqinnissamillu suli piumasaqarfigineqartassapput
- Immersugassaq Sumut 31. december 2021 tungaanuugallartoq suli atuutsinneqassaaq
- Nunatsinni najugaqanngitsut 31. december 2021 tungaanuugallartoq akiuussutissalersimasut kisimik tikittarsinnaassapput
- Tunillatsissimasinnaasunik ujartuisarneq 31. december 2021 tungaanuugallartoq ingerlanneqassaaq
- Akiuussutissalersuineq annertunerusumik suli ingerlanneqassaaq
- Aappassaanik akiuussutissalertinnermit ullut 14-it qaangiukkaangata naammassilluni akiuussutissalersimasutut taaneqarsinnaalertassapput
Nunatsinnut tikittut naammassillutik akiuussutissalertissimagunik nunatsinni illoqarfinni anginerusuni angerlarsimagallaqqaanngikkaluarlutik illoqarfinnut mikinernut nunaqarfinnullu toqqaannartumik angalasinnaalerput.
- Tunillaassuunnerup nunatsinnut pinngivinnissaa anguniarunnaarlugu, kisiannili nunatsinni tunillatsissimasut ikinnerpaaffissaminniitinnissaat maanna anguniagaraarput, Naalakkersuisut siulittaasuat Múte B. Egede tusagassiortunik katersortitsinermi oqarpoq.
Nunatta ammariartuaarnissaanut pilersaarut qangali suliarineqartaraluarpoq. Unitsinneqarallartariaqarsimavorli nunatsinni tunillaassuunnerit arlallit aallarteriasaarnerat pissutigalugu.
Killilersuutit Sisimiuni atorallassapput
Sisimiuni suli annertuumik tunillaassuuttoqarpoq. Aasiannili Upernavimmilu pissutsit pitsaanerulerput.
Taamaammat Aasianni Upernavimmilu qanermut assiaquteqaqqusineq katersuussinnaanermullu killilersuutit atorunnaarsinneqarput, Sisimiunili suli atuutissallutik.
Pisortat suliffeqarfiini allanilu katersuuffiusuni qanermut assiaquteqarnerit, inuit amerlanerpaamik 20-t illuni katersuuffiusinnaasuni silamilu killeqarneri, angallannernilu killilersuutit Sisimiuni atuutsinneqartut 31. oktober tungaanut atuutsinneqarallassapput.
Naalakkersuisut tallimanngornermi tusagassiortunik katersortitsinerminni taama ilisimatitsipput.
Sisimiuni tunillatsissimasut sisamat nutaat sisamanngornermi paasineqarsimapput.