Múte B. Egede Washingtonimi nersornaaserneqalersoq

Naalakkersuisut siulittaasuat aqutsilluartutut Washington DC-miittumi Wilson Centerimi nersornaaserneqassaaq, siulittaasoq pingasunngornermi nersornaaserneqarnissaminut USA-mukalerpoq.

Múte B. Egede Washington DC-mi pingasunngorpat nerersuaqatigiinnermi nersornaaserneqassaaq.

Múte B. Egede aqutsilluartutut nunarsuarmillu pitsaanerulersitsiniarluni suliaqarsimasutut pingasunngornermi ataqqinaataasumik nersornaaserneqarnissamutWashingtonimut qaaqquneqarsimavoq. Siusinnerusukkut nersornaaserneqarsimasut ilaatigut ilagaat Henry Kissinger, Hillary Clinton, Colin Powell aamma Condoleezza Rize.

Nunarsuarmi sumiiffinni assigiinngitsuni inuunermi atukkanik pitsanngorsaaniarluni inuussutissarsiornerup, ilisimatusarnerup, eqqumiitsuliornerup politikkillu iluini aqutsilluartut nersorniarlugit nersornaasiisoqartartoq, Wilson Centerimit oqaatigineqarpoq.

Múte B. Egede suleqatigisani peqatigalugit aqutsilluarsimasutut nersornaaserneqarnissaanut Wilson Centeri tunngavilersuilluni ilaatigut allappoq:

- Kalaallit Nunaanni avatangiisit eqqarsaatigalugit naapertuilluartuunissamik kalaallillu inuiaqatigiit eqqarsaatigalugit ukkatarinnillutit aqutsinivit takutippaa nersornaaserneqarnissat tutsuiginartuusoq.

- Wilson Quarterly-mi ilanngutassianni allaaserivat, Kalaallit Nunaata nuarsuarmi tamarmi suleqateqarneratigut Kalaallit Nunaat aningaasaqarnikkut, politikkikkut inuttullu atukkatigut qanoq ineriartortinneqarsinnaanersoq. Anguniakkap tamatuma aamma Greenland Dialoques pillugu suliniuteqarnermi suleqatigiinnitta takutippaat, Kalaallit Nunaat Issittumi qanoq aqutsisuusinnaanersoq.

Pingasunngornermi unnukkut nersornaaserneqassasoq

Kalaallit Nunaanni nalunaaqutaq malillugu pingasunngorpat unnuap-qeqqalivinnerani nersornaat Wilson Centerimi nerersuaqatigiinnermi tunniunneqassaaq.

Wilson Centeri amerikamiut kongresiannit 1986-imi aningaasaliiffiginearluni tunngavilerneqarsimavoq, præsidentiusimasumut Woodrow Wilsonimut pisortagitoortumik eqqaasutissatut.

- Partiimi politikki eqqarsaatigalugu isummersuisartuunngitsut arlaannaannullunniit attuumassuteqanngitsumik ilisimatusarneq aamma politikkikkut suliaqarnermi iliuusissatut isumassarsianik ilisimatitsiniarluni ammasumik oqaloqatigiittarneq aqqutigalugit nunarsuarmi pisunik suliaqartarput, nersornaasiiniartut nittartakkamikkut ilisimatitsipput.

Wilson Center nunanit tamalaanit akuerisaavoq, 2019-imilu Global Go To Think Tank Index Report ingerlanneqarmat nunarsuarmi nunap immikkoortuinut atatillugit pitsaanerpaamik isummersuisartutut toqqagaasimalluni, tassani aamma sumiiffinnut allanut atatillugu nunarsuarmi isummersuillaqqinnerpaanit pitsaanerusutut taaneqarsimalluni.

Powered by Labrador CMS