Múte B. Egede ullut 100-t qaangiutereersullu: Ilorraap tungaanut ingerlavugut
IA-p pissaanermik tigusineraniit Karrat Kangerluat coronalu ullut 100-t siulliit initusimaqaat. - Naak corona initugaluaqisoq, Kalaallit Nunaat issittumi annertunerusumik oqartussaaqataatsilerparput, Naalakkersuisut siulittaasuat oqarpoq.
Naalakkersuisunngorlaat innuttaasut amerlanerussuteqartut apriilip 16-ani taasereersullu ingerlaannaq sullisertik atuaat. Múte B. Egedep oqaasii naapertorlugit Naalakkersuisut maannamut suliat katillugit 207-t suliarilersimavaat. Taakkunannga suliat naalakkersuisuusimasunit aallartinneqarsimasut aamma ilaapput.
- Kunngeqarfik Danmarkip iluani Kalaallit Nunaat nunanut allanut isumannaallisaanermullu annertunerusumik akisussaaffeqalernera tanngassimaarutigaara. Ukiorparujussuarni angorusussimasarput anguarput. Amerikarmiut nunanut allanut ministeriat tikeraarpoq aammalu taamaalilluta suleqatigiinnitta nukittuup inerisaqqinnissaanut akunnitsinni paaseqatigiiffigalugu. Nunarput nunanut allanut tunngasunik oqartussaassuseqarnerulerneranut alloriarneq pingaarutilerujussuuvoq. Neriuppunga siunissami Naalakkersuisussat taanna eqqaamallugu uterfigiuartuassagaat, Naalakkersuisut Siulittaasuat Sermitsiaq.AG-imut oqarpoq.
Tunillaasuuneq
Kujallermi juulip arfernani coronamik tunillatsittoqarsimasoq paasineqareersorlu coronap Nunatsinni tuniluunerusunissaa pinaveersaartinniarlugu Naalakkersuisut siulittaasuata sulliserluni aallartippoq.
- Corona sulininni initusimaqaaq, kisianni qineqqusaarnerup nalaani neriorsuutitsinni piviusunngortitsinissatsinnut aporfiunngilaq. Naalakkersuisut siulittaasutut peqqissutsimullu naalakkersuisoq corona pillugu akisussaaffeqartuupput. Maanna Kiistap akisussaaffimmik annertunerusumik tigusinissaa sulissutigileruttorparput, Naalakkersuisut siulittaasuat oqarpoq.
Partiit siulittaasuisa peqatigalugit Nunarput decembarip tungaanut ammariartuaaqqinnissaa sulissutigineqartoq, Múte B. Egedep siusinnerusukkut paasissutissiissutiginikuuaa. Taannalu suliassaq Nunatta coronamik eqqugaaqqanera pissutaalluni arlaleriarluni kinguartinneqartarpoq.
- Ammariartuaaqqinnissaq eqqarsaatigalugu taava suli akiuussusersorneqanngitsut isiginiartariaqarpagut. Naartusut, milutitsisut meeqqaniillu 12-iniit ukiulinniit qummut isiginiartariaqarpagut. Akiuussusersuinissamut pilersaarutit aamma isiginiartariaqarparput ammaaqqinnissamut pilersaarusiussagutta, Naalakkersuisut siulittaasuat oqarpoq.
Aqqut eqqortoq nassaarineqartariaqarpoq
Ukiuni sisamani Naalakkersuisut iluminni isumaqatigiissutaat malinneqarnissaat qulakkeerniarlugu Naalakkersuisoqarfiit Naalakkersuisullu qanoq suliniarnissaminnut aaqqissuusinissaat Naalakkersuisut suliattaasuaniit suliakkiutigineqarnikuuvoq. Suliakkiutigineqartut ilagaat piujuaannartitsilluni ineriartortitsinnissaq, inuiaqatigiit akornanni naligiinerulernissaq peqqinnissaqarfillu pitsanngorsarneqarnissaa.
- Naalakkersuisut iluminni isumaqatigiissutaat piviusunngortinniarlugu ukioq siulleq piareersaanernut timitalersuinernullu atorneqassaaq. Ukiup aappaa, pingajuat sisamaallu tamarmik qanoq ittunik pingaarnersiuneq eqqarsaatigalugu toraarfeqassapput, Múte B. Egede oqaluttuarpoq.
Asii Chemnitz Narup, Aningaasaqarnermut Naalakkersuisut aamma Naaja Nathanielsen Ineqarnermut, Attaveqatigiinermut, Naligiisitaanermullu Aatsitassanullu Naalakkersuisuusoq maanna suliaminnik assigiinngitsunik aqqutissaqalersimasut, Mútep erseqqissaatigaa.
Mittarfissuit sanaartorneqarneranut ammanerusumik periuseqartoqalernissaa qulakkeerneqarnikuuvoq. Innuttaasut Inatsisartullu sanaartornerup ingerlannga annertuumik soqutigisaqarfigimmassuk.
- Innuttaasut tunngavissaqarlutik oqallissinnaasariaqarput. Maanna oqallinnerit allanut sangusaqattaarsinnaapput, taamaammat paasissutissanik tunngaviusussanik ujartuivugut.
Inatsisartut ataatsimiinissaanut neriuuteqarneq
Naalakkersuisut Suliuttaasuat illuatungiliuttutut 2013-imili inissisimanikuuvoq, taamani Siumut Naalakkersuisuutitaqaleqqippoq IA ukiuni sisamani siuttooreersorlu. Ukiamut Inatsisartut ataatsimiilerpata politikkerit akerleriinerat inunnullu ataasiakkaanut tunngasut pillugit oqallinnerit annikinnerunissaat, Múte B. Egedep neriuutigaa.
- Neriuppunga akerleriinerit pisariaqavinngitsut annikinnerussasut, ingammik inuiaqatigiinut annertuumik pingaarutillit eqqartorneqartillugit. Soorunami isumaqatigiinnginnerit inissaqassapput, kisianni politikkerit inuiaqatigiit akornanni toqqissisimatitsinissat annertuumik akisussaaffigaat, Naalakkersuisut siulittaasuat naggasiivoq.