Múte B. Egede Københavnimi eqqugaasunut eqqarsaatiginnippoq
Sapaatiummat Københavnimi aallaasersortoqarnerani eqqugaasunut ilaqutaasunullu Naalakkersuisut siulittaasuat Múte B. Egede misiginneqataavoq. Kalaallinut pisumit sunnerneqarsimasunut ikiorserneqarnissaq periarfissaasoq, taassuma oqaatigaa.
Naalakkersuisut Siulittaasuat Múte Bourup Egede ippassaq Amagerimi niuertarfeqarfissuarmi Fieldsimi aallaasersorneq pillugu tupassimaqaaq.
- Eqqarsaatikka pinerlineqartuniipput aamma inuit asasaminnik annaasaqarsimasut misiginneqatigaakka. Pisimasoq amiilaarnartuuvoq aamma attortittut tamaasa eqqarsaatinniitippakka, Múte Bourup Egede oqarpoq.
Aasaanerani sulinngiffeqarnerup naligaa aamma Fields tassaavoq kalaallisut innuttaasorpassuit niuerfigisartagaat. Niuertarfeqarfissuarmiissimagaanni arlaannillu oqaloqateqarnissamik pisariaqartitsisoqarpat taava Tusaanngap oqarasuaataani 801180-imi siunnersortit ikiuunnissaminnut piareersimapput, sms: 1899
Amagerimi oqaluffik sivisuumik ammavoq
Psykiatrifonden akeqanngitsumik atinillu isertuussilluni oqarasuaatikkut 3925 2525-kkut siunnersuinissamut piareersimavoq.
Ørestadimi oqaluffik sap. ak. uani ataasinngornermiit tallimanngornermut nal. 12.00-imiit 15.30-p tungaanut immikkut ittumik ammassaaq. Oqaluffik tarnimikkut aliasuttunut, naneruutinik ikitsinissanut imaluunniit pisariaqartitsisunut najorteqatigiinnissamut ammavoq. Ørestadimi oqaluffik uaniippoq, 8 Tallet, Robert Jacobsens Vej 72B, 2300 København S.
Danmarkimiikkuit ikiorserneqarnissamut periarfissat arlaqartut, siulittaasup naalakkersuisoqarfia ilisimatitsivoq.
Københavnimi Psykiatrisk Centerimit ilisimannittunut inunnullu sapaammi Fieldsimiissimasunut pisariaqartitsisunullu tarnit pissusaannik ilisimasallit ikiuunnissaminnik neqerooruteqarput. Tamanna Kastrupimi Løjtegårdsvej 64-imi Amagerhallenimi pissaaq.
Illoqarfiit pingaarnersaanni pinerlineqarsimasunik siunnersuisarfik pinerlineqartunut, ilisimannittunut ilaqutaasunullu pinerlineqarsimasunut ajutoorsimasunullu ikiuunnissamik neqerooruteqarpoq. Pinerlineqarsimasunut siunnersuisarfik ulloq unnuarlu ammasarpoq oqarasuaataalu tassaavoq 2120 9170
Meeqqanut oqarasuaat meeqqanut inuusuttuaqqanullu arlaannik oqaloqatiginninnissamik pisariaqartitsisunut ulloq unnuarlu ammasarpoq - 116 111-mut sms-ersinnaavutit imaluunniit sianersinnaavutit. Aamma Børnetelefonen-ikkut allallutit attaveqarsinnaavutit:
Røde Korsip ikiuunnissamut oqarasuaataatigut 3529 9660-ikkut tarnit pissusaannik ilisimasallit ikiuunnissaminnut piareersimapput. Oqarasuaat taanna nal. 09.00-imiit 15.00-ip tungaanut ammasarpoq