Skip to main content

Munckimi pisortaq: Akisussaaffipput pimoorupparput

Munck Gruppnenip Nuummi sulisui arlallit tunillatsereersut, pisortap sulisut akornanni suliffeqarfimmilu pissutsit maanna oqaluttuarai.

Suliffeqarfissuarmi Munck Gruppenimi pisortap Hans Christian Munckip Nuummi suliffeqarfimmi manna tuniluuttoqarnera uggoraa, miserratiginnginnerarpaalu suliffeqarfiup tuniluuttoqarnerani erseqqissumik saqqummiussisimannginnera.

- Pisoq manna sivisuumik atuussimasoq ajuusaarutigilluinnarparput, taanna Sermitsiaq.AG-mut oqarpoq.

Pisortaq sulisut akornanni tunillatsittoqarsimasoq paasineqaqqaarmat juunip sisamaanili Nuummukarsimavoq, tassani suliffeqarfik tapersersorlugulu nunami oqartussanik oqaloqatiginninniarluni.

Hans Christian Munckip erseqqissaatigaa, suliffeqarfimmit akisussaaffik pimoorunneqartoq, aamma pisup ingerlanera tamaat oqatussat ullut tamaasa oqaloqatigilluarneqartartut, taamatuttaaq tuniluuttoqaqqilersinnaanera sapinngisamik pinaveersaartinniarlugu iliuuserineqarsinnaasut tamaasa atorlugit iliuuseqartoqartartoq.

- Sulisut malittarisassanik malinnissimanngitsut paasigaangatsigu sukannersupilussuarmik iliuuseqartarpugut, pisortaq oqarpoq, nangillunilu:

- Ajuusaarutigaarput erseqqinnerusumik nalunaaruteqarnissarput najukkami innuttaasut, politikkerit tusagassiorfiillu amigaatigisimassappassuk.

Sanaartorneq unitsiinnarneqarsinnaanngitsoq

Najugaqarfimmi piffissami kingullermi nutaanik tunillatsittoqarsimanngikkaluartoq, Munck Gruppenimit kikkut najugaqarfimmut appakaattarnersut suli nakkutigineqarpoq, ilaatigut sulisussarpassuarnik pisariaqartitsisoqarnera pissutigalugu nunanit allanit suliartortut arlallit tikittarnerat eqqarsaatigalugu.

- Najugaqarfimmi tuniluuttoqarnera paasineqarsimanngimmat sanaartornerup unitsiinnarneqarnissaa isumaqanngissorivarput, taamaammat neriuutigaarput suliffitsinni tuniluuttoqarunnaassasoq. Soorunami suliffimmi tuniluuttoqalinnginnissaa anguniarlugu suliffimmut isaasut suliffimmiillu aniasut eqqumaffigineqartussaapput, taanna oqarpoq.

Pisortap oqaluttuaraa, corona suliffeqarfimmut annertuumik kingunerluuteqarsimasoq.

- Nalunngilarput Nuummi annertuumik suliaqarnitsinni, oqartussat Kalaallit Nunaanni coronap tuniluunneranik isumaginninnerannut sapinngisatsinnik ikiuunnissamut annertuumik akisussaaffeqarluta. Tamatumunnga peqatigitillugu sanaartornerup sapinngisamik annikinnerpaamik kinguaattorfiunissaa eqqarsaatigalugu sanatitsisunut pisussaaffeqarpugut. Tamanna naammaginartumik iluatsissimavarput, tassalu pissutsit ilungersunaraluartut sanaartornerput ajunngitsumik ingerlassinnaasimavarput.

Najukkami najugallit Munckimik nakkutiginnittut

Najukkami tusagassiorfinnit suliffeqarfik tassanilu sulisut maannakkorpiaq sammineqarput. Ilaatigut innuttaasut arlallit Munckimi sulisut illoqarfimmi angalaartarnerat oqaaseqarfigisarpaat, sulisullu malittarisassanik mattusimanissamullu malinninnginnerartarlugit. Tamannali eqqortuunngilaq, pisortaq erseqqissaavoq.

Munck Gruppenimimi sulisoqarpoq Nuummeersunik, taakkulu najugaqarfimmi najugaqannginnamik mattusimasaratik.

- Soorunami Nuummi innuttaasut takujuminaatsissinnaavaat, sulisutta ilaat najugaqarfimmi najugaqarnersut najugaqannginnersulluunniit. Tamatuma malitsigisaanik inuit sulerisarnersut pillugu tusatsiakkat pilersarput, sulisulli akornanni malittarisassanik unioqqutitsisoqarsimanersoq ilisimanngilarput.

Nunatsinni nakorsaanerup marlunngormat tusagassiortunik katersortitsinermi ilisimatitsissutigaa, oqartussat maannakkut paasissutissaataat malillugit, kingullertigut tunillatsittoqarsimaneranut atatillugu malittarisassanik unioqqutitsisoqarsimanngitsoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER