Munck Gruppen malittarisassanik unioqqutitsineq pillugu: Oqaaseqarsinnaanngilagut
Munck Gruppen, ingerlatseqatigiiffimmi sulisup ataatsip coronavirusimik tunillatsissimaneranut atatillugu mattussimasussaanermut malitarisassat unioqqutinneqarsimarat pillugu nutaarsiassamut oqaaseqarusunngillat.
Nunatsinni nakorsaanerup marlunngormat tusagassiortunik katersortitsinermi oqaluttuaraa, Munck Gruppenimi sulisup ataatsip Kalaallit Nunaannut tikinnermini coronavirusimik tunillatsissimanera paaneqarmat, mattusimasussaanermut malittarisassat malinneqarsimanngitsut.
- Tusagassiivitsigut tamanit ilisimaneqarsimavoq, Ilulissani ataatsimeeqatigiissimanerit ilaat apeqquserneqarsimasut. Pisut ilaanni malittarisassat malinneqarsimanngillat, Henrik L. Hansen oqarpoq.
Sermitsiaq.AG-p Munck Gruppen arlaleriarluni attaveqaffigisarsimavaa, ingerlatseqatigiiffiulli pisimasoq oqaaseqarfigerusunnangulu, sulisuminnik Kalaallit Nunaannukartitsigaangamik mattusismasussaanermut maittarisassanik sooq malinnittoqarsimannginnera pillugu apeqqut akissuteqarfigerusunngilaa.
Munck Gruppenip oqaaseqartartuata Sermitsiaq. AG-mut oqaatigaa, pisoq inummut tunngasutut isigineqartoq. Ingerlatseqatigiiffimmit pisoq oqaaseqarfigineqarusunngilaq, erseqqissaatigaalli nunatsinni nakorsaanermik suleqateqarluarlutik aamma nunatsinni nakorsaanerup inassuteqaataanik malinninniarlutik.
Borgesteri angerlartinneqartoq
Pisimasup malitsigisaanik borgmesteri, kommunimi pisortaq Avannaatalu Kommuniani sulisut arlallit Munck Gruppenimi sulisunik ataatsimeeqateqareerlutik angerlartinneqarput.
Nunatsinni nakorsaanerup marlunngormat tusagassiortunik katersortitsinermi erseqqissaatigaa, avataanit tikittut tunillatsissimannginnerminnik misissorneqarsimatinnatik pisortanik inunnilluunniit allanik ataatsimeeqateqartassanngitsut.