Multiarenamik pilersitserusuttut: Naalakkersuisut tapersersorusuppaatigut?
Ilulissani multiarenamik pilersaarut maanna uninngagallarpoq. Naalakkersuisuniilli tapersiissummik nalunaarfigineqarnissaq alloriarnerup tullerisinnaavaa, tassami aningaasaateqarfinnut qinnuteqarnermi, Naalakkersuisunit taperserneqarneq iluaqutaassammat. Naalakkersuisulli suli iliuuseqanngillat
Ilulissani susassaqarfiit amerlisinniarlugit Multiarenamik pilersitsinissaq anguniagaanikuuvoq ukiuni arlalinngortuni.
Pilersaarut Multiarena qulisamik isikkamik arsaattarfeqassaaq kiisalu kulturikkut pisoqarfinni aamma atorneqartartussatut pilersaarutaalluni.
Pilersinneqarnissaanut siullermik 140 million koruuneqarnissaa naatsorsuutaareerpoq, pilersaarusuiortuniilli 80 millioninit 85 million koruuninut naleqarnissaa maanna siunnerfigineqalernikuulluni.
Taperserneqarnissamik neriuut
Pilersaarut piviusunngussappat taperserneqarnissaq pingaaruteqarpoq.
- Naalakkersuisunit taperserneqarnissarput neriuutigaarput. Aningaasaateqarfiit qinnuteqarfissagut piumasarisarpaat siammasissumik taperserneqarnissaput. Peqatigiiffinnit, Timersortartut Kattuffianit aamma Avannaata Kommunianit tapersersorneqarpugut, taamaattumik Naalakkersuisunit allakkatigut taperserneqarnissaput pingaaruteqarpoq, Multiarenamik pilersitsisoqarnissaanik siulittaasoq Niels Davidsen Sermitsiaq.AG-mut oqarpoq.
Saaffiginnissut akineqassasoq
Inatsisartuni ilaasortaq Múte Bourup Egede (IA) pagraf 37 naapertorlugu una pillugu apeqquteqarpoq januaarimi. Pilersaarusiortunit saaffigineqarsimanersut ilaatigut apeqqutigaa.
Kultureqarnermut naalakkersuisup Ane Lone Baggerip uppernarsarpaa pilersaarusiortunit saaffgigineqarsimallutik, saaffiginnissullu akineqarumaartoq ilisimatitsilluni.
Suli tusagaqanngillat
Taamaattoq Niels Davidsen suli naalakkersuisunut ilaasortamit suli tusagaqanngilaq.
- Februaarip naannginnerani akineqarnissarput neriuutigaara. Aningaasanik piumasaqanngilagut taamaallaat ilumut pilersaarummut taperserneqassanerluta paaserusupparput, tassanngaanniimmi ingerlariaqqiffiit tulliit tigusinnaalissavagut, Niels Davidsen oqarpoq.