Skip to main content

MT Højgaardimi pisortaaneq: Ajutoornikkut toqusoqareersoq isumannaallisaaneq ukkatarinerulerparput

MT Højgaard aggustimi ajutoornikkut toqusoqareersoq sullivinnik nakkutilliisoqarfimmit ingerlaannartumik peqqussuteqarfigineqarpoq. Sullivinnik nakkutilliisoqarfik naapertorlugu, qutsissumi sulinermi illersuutinik atuisoqarsimannginnera ajutoortoqarsimaneranut pissutaavoq.

Nunami maani piffissami kingullermi inuit sanaartorfinni suliffeqarfinnilu allani nakkarnikkut ajunaartut arlaliusimapput. Ajutoornerit ilaat ataaseq Nuummi MT Højgaardip Kujallerpaani ilinniartut inissaannik nutaanik sanaartorfigisaani pisimavoq.

Sulinermi ajutoortoqarnerani ileqquusutut sullivinnik nakkutilliisoqarfimmit ajutoorfimmukartitsisoqarsimavoq, suliffeqarfillu ingerlaannartumik peqqussuteqarfigineqarsimalluni.

- Peqqussutit pissarsiarisavut malillugit soorunami iliuuseqarsimavugut, MT Højgaardimi pisortaaneq Torben Nielsen Sermitsiaq.AG-mut oqarpoq.

Isumannaallisaatinik atortoqarni platformimiissimasoq

Aaqqissuisoqarfimmit sullivinnik nakkutilliisoqarfiup nalunaarusiaa takuneqarsimavoq, tassani ukioq manna aggustip 16-iani ajutoorneq allaaserineqarsimalluni. Nalunaarusiaq malillugu, syv meterisut portutigisumiit nakkarluni ajutoortoqarsimavoq.

Sulisoq platformimiissimavoq, tassani sulisut illup iluaniit eqqakkani silammut kranimik ikiorteqarlutik annissisinnaaniassammata ungalorisat ilaat peerneqarsimapput. Sulisoq ajutoortoq isumannaallisaatinik atortoqarsimanngilaq. Sullivinnik nakkutilliisoqarfimmit taamaammat nalilerneqarpoq, illersorneqarsinnaanngitsumik isumannaallisaatinik atortoqarani sulisoqarsimasoq.

MT Højgaardimi pisortaanerup Torben Nielsenip ilisimaarilluinnarnerarpaa, suliffeqarfik sanaartorfimmi sulisunut akisussaaffeqartoq.

-  Aqutsisutut akisussaaffeqartuaannarpugut. Taamatut pisoqaraangat akisussaaffipput qimarratigisinnaanngilarput. Sulisunulli oqaatigiuaannarparput, sanaartorfimmi periusissiat nassuiaatillu malittassagaat. Malittarisassanillu malinnittoqanngikkaangat ajoraluartumik taamatut ajutoortoqartarpoq.

Suliffeqarfinnut mikinerusunut ajornakusoortoq 

Nalunaarusiami atuarneqarsinnaavoq, sulinermi ajutoorfiusumi pineqartumi malittarisasat malillugit sulisoqarsimanngitsoq, sulisut sanaartorfiup avataani platformimiittussaanngimmata. Torben Nielsen pisumut attortissimaqaaq, oqaluttuaraalu siunissami taamatut pisoqaqqinnginnissaa anguniarlugu tamaviaarluni iliuuseqartoqartoq.

- Ajutoortoqarnerata kingornatigut sulisut sanaartorfinni isumannaallisaanermut atatillugu malittarisassanik ilitsersuutinillu malinninnissaannik oqaluussimavagut - pingaartumik qutsissumi sulisoqartillugu.

Suliffeqarfiilli tamarmik isumannaallisaanissamik ukkatarinninniarnissaq ajornaatsuinnaatittanngilaat, pisortaaneq oqarpoq.

- Uagut suliffeqarfissuartut sulisut isumannaallisaanermi ilinniartinneqarnissaannut il. il. atortussaqarpugut, suliffeqarfeerarpassuaqarporli uagutsitut periarfissaqanngitsunik.

Sullivinnik Nakkutilliisoqarfimmi apersorneqarnissamut piffissaqanngitsut

Torben Nielsenip oqaatigaa, sullivinnik nakkutilliisoqarfik suliassarpassuaqartoq, maannakkorpiarmi nunami maani sanaartortoqarluarmat.

- Sulisut Kalaallit Nunaanni tamarmi suliaqarsinnaanerat ilimananngilaq. Sullivinnik nakkutilliisoqarfik amerlanerusunik sulisoqartuuppat, pinaveersaartitsilluni suliniuteqarnerusoqarsinnaavoq.

Sermitsiaq.AG-mit sullivinnik nakkutilliisoqarfimmi pisortaq apersorniarlugu sapaatip-akunnerini marlunni pissarsiariniarneqarsimavoq, tamannali suli iluatsinneqanngilaq. Sullivinnik nakkutilliisoqarfimmit tusagassiorfitsigut nalunaaruteqarluni allapput, piffissami kingullermi ajutoortoqartarnerata malitsigidaanik sulisumik ataatsimik sulisut ilaneqarsimasut, siunissamilu sulinermi ajutoorsinnaanerit pinaveersaartinniarlugit suliniuteqarneq annertusineqarsimasoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER