MT Højgaard timmisartoqarfissap illutassaanik sanaartortussanngortoq
MT Højgaard International Nuummi timmisartoqarfissap illorsuartassaanik kiisalu kiffartuussisarfimmik aamma timmisartuniktikittussanik aallartussanillu nakkutilliisoqarfimmik sanaartortussanngorpoq.
Kalaallit Airportsimit nalunaarutigineqaqqammerpoq, Nuummi atlantikukkoortaatinut mittarfissap illutassaanik suliarinnittussarsiuussisoqarmat MT Højgaard sanaartortussatut toqqarneqarsimasoq. MT Højgaardip qinnuteqarnermini Articoq aamma Permagreen Istákilu ajugaaffigisimavai.
Sanaartugassai tassaapput:
Timmisartoqarfiup illorsuartassaa 7.200 kvadratmeterisut angitigisoq
Atortussaasivik 3.200 kvadratmeterisut angitigisoq
Nakkutilliisoqarfik 230 kvadratmeterisut angitigisoq
Sanaartornissamut pilersaarusiorneq Zeso Architetcts suleqatigalugit qanittukkut aallartinneqassaaq, sanaartornerlu ukioq manna juulip aallaqqaataani aallartinneqassalluni.
Nakkutilliisoqarfissaq 2022-mi juunip qaammataani tunniunneqassaaq, illutassaali aatsaat 2023-mi juunip qaammataani naammassillugit suliarineqarsimassallutik.
Nunap eqqaaniittup isikkuanut naapertuutissasut
- Illuliat pingasut tamarmik sisammik ilusilersorneqassapput oqitsunik igalaanik aamma aluminiumik immikkoortortanik, taama tulleriillutik qallersorneqarlutik sananeqassapput. Mittarfiup illorsuartaa (aallartarfik tikittarfik) Nuummi qaqqat illoqarfimmik ungalusimasut aaqqissugaanerat ersersillugu qallersorneqassaaq, Kalaallit Airports tusagassiorfinnut nalunaaruteqarnermi allappoq.
Aviaaja Karlshøj Knudsen, Kalaallit Airports International A/Si-mi pilersaarusiornermut pisortaq imatut oqarpoq:
- Qujanarpoq suliniutip ilaa taanna iluatsilluartumik suliariumannittussarsiuunneqarsimammat. Illuliat mittarfinnut suliniutinut pingaaruteqarput aamma nunanut assigiinngitsunut mittarfinni nutaani taakkunani sullissinerup pitsaassusianut ilaasullu misigisaannut pitsaassutsimik aalajangiissapput. Kalaallit Airports International A/S-ip suliassami pingaarutilimmi tassani MT Højgaard Internationalimik suleqateqarnissani qilanaaraa..
Jóannes Niclassen, MT Højgard Grønlandimi pisortaaneq imatut oqarpoq:
- Mittarfimmi illulianik nutaanik sanasinnaatitaalernerput tulluusimaarutigaarput. Nunanut
assigiinngitsunut mittarfik nutaaq Nuummut annertuumik pingaaruteqalersinnaavoq. Suliniut annertuvoq aamma soqutiginarpoq, tassani Kalaallit Nunaanni illoqarfinni aalajaatsumik attaveqarnerput nuannaarutigaarput..
Ilulissani Qaqortumilu suliarinnittussarsiuussinissaq isumaqatiginninniarnissarlu eqqarsaatigalugit, Kalaallit Airportsimit isumaqatigiissuteqarnerup qanoq akeqarnera paasissutissiissutigineqarusunngilaq, ilisimatitsissutigaalli missingersuutit iluini isumaqatigiissuteqartoqartoq.