MT Højgaard Kalaallit Nunaanni suliaminik annertusaasoq

MT Højgaard International nunami maani najugalimmik pisortanngortitsinermigut nunami maani suliaqartarnerminik ukkataqarnerulerniarpoq, pisortanngortinneqartup ilaatigut MT Højgaardip Nuummi immikkoortortaqarfiini MT Højgaard Grønlandimi aamma Arssarnerni allaffissorneq annertusassavaa.

Arssarnerni ukiorpassuarni pisortaasimasoq Torben Nielsen Kalaallit Nunaanni siunissami suliarineqartussanik aqutsisuusassaaq.

MT Højgaard Internationalip Sermitsiaq.AG-mut erseqqissaatigaa, Kalaallit Nunat sanaartorfittut ukiorpassuarni suliffeqarfimmut pingaaruteqarsimasoq.

- Ukiorpassuarni Kalaallit Nunaanni suliaqartarsimavugut, Kalaallillu Nunaanni suliaqarnissamut piginnaasaqarluartutut ilisimasaqalersimalluta. Kalaallit Nunaanni suliaqartarnitta nukittorsarneratigut nunami piffissaq ungasinnerusoq eqqarsaatigalugu anguniagaqarnerput erseqqissaassutigaarput, MT Højgaardimi pisortaaneq Peter Kofoed oqarpoq.

Kalaallit Nunaannut attuumassuteqarluartoq

Pisortanngortinneqartoq 1981-imili Kalaallit Nunaanni najugaqarsimavoq, kalaallimik nuliaqarpoq nunamullu attuumassuteqarluarluni. Aamma Arssarnerni ukiuni 17-ini pisortaasimagami suliassaminut tunngavissaqarluarlunilu ilisimasaqarluartuuvoq, taamaammat MT Højgaard Internationalip Kalaallit Nunaanni suliaqarneranut aqutsisussatut piukkunnarluinnartuuvoq, MT Højgaard Internationalimi pisortaaneq Peter Kofoed oqarpoq.

Torben Nielsenip ilisimatitsissutigaa, Arssarnerit ingerlanneqarnerannut pisortassamik atorfinitsitsisoqarniartoq, taanna ullinnarni aqutsisuullunilu imminerminut atassuteqartassasoq.

Piffissamut ungasissumut anguniakkat

Torben Nielsen sulilluni aallartinnissaminut qilanaarluinnarpoq:

- Suleqatissakka piginnaasaqarluinnartut peqatigalugit Kalaallit Nunaanni inissisimanitta nukittorsarneqarnissaanut qilanaarpunga. Suliassaqarfik ilippanaateqarluinnartoq pissanganartuuvoq, taanna Sermitsiaq.AG-mut oqarpoq.

Suliffeqarfiup allaffimmi sulisut tallimat Nuummut nuutsinniarpai. Tassani ilaatigut pineqarput, Københavnip eqqaaniittumi Sæbergimi sulisoqarnermut aningaasaqarnermullu atatillugit sulisorineqartut. Taamaammat nunaqavissunik atorfinitsitsisoqartussaavoq, Torben Nielsen erseqqissaavoq.

- Sapinngisatsinnik najugaqavissunik atorfinitsitserusunneruvugut, aammali inuit avataaneersut pisariaqartinneqartussaapput, taanna oqarpoq.