MSC: Pingaarutilimmik allagartaliineq raajanik avammut niueruteqarnermut iluaqutaassaaq
Kalaallit Nunaata kitaani raajarniarneq 2023-p tungaanut allagartartaaqqippoq. Tamanna avammut neriuteqarnermut iluaqutaassaaq – pingaartumik asiamut niueruteqartarnermut
Kalaallit aalisartuini siullersaalluni Kalaallit Nunaata kitaani raajarniarneq nungusaataanngitsumik aalisartutut 2013-imi MSC-mik allagartartaarpoq. Allagartaq taama ittoq ukiuni tallimani atuuttarpoq, maannalu allagartap nutarterneqarnissaanut piffissanngorsimavoq.
Iluatsittumik tusarniaanerit
- Marlunngorneq 31. juli taamaalilluni MSC Londond-imiittoq
nalunaaruteqarpoq, nalilersuinerit tusarniaanerillu iluatsittumik naammassineqarsimasut, allagartarlu, ukiuni tulliuttuni tallimani 2023-p tungaanut atuuttussaq, tunniunneqartoq, Sustainable Fisheries Greenland (SFG) siulittaasoq Lisbeth Due Schönemann-Paul, tusagassiuutinut nalunaarummi paasissutissiivoq.
Allagartaq akuerissut siulleq 2013-imi tunniunneqarmat, piumasaqaatit pissutsillu immikkoorutillit qulit allagartamut akuersissummut ilaatinneqarput. Matumani piffissami akuersissummik allagartaqarfimmi pissutsit aaqqitassat piumasaqaataasimapput, tamannalu iluatsissimavoq, SFG paasissutissiivoq.
- Akuersissutinik allagartanik allanik iluatsittumik pissarsinissamut periarfissaqarnersoq, taakkulu atuutilersinnaanersut, SFG-mi siulersuisut sulisullu ataavartumik nalilersortuarpaat.
Taamaaliortuarnissaq pisariaqarpoq, tassami kingullertigut nungusaataanngitsumik aalisarnissamut niuerfiit piumasaqaataat malunnaatilimmik sakkortusiartorput. Taamaalillutik Asie-mi niuerfissuit aalisakkanit qalerualinnillu tunisassiat MSC-mik nalunaaqutsersimanissaannik piumasaqaataat sakkortusiartuinnarput, taamaattumik nalilerneqarpoq tunisatta akigissaartillugit
tunisarnissaat qulakkiissagutsigu, piumasaqaatinik tamakkuninnga malinnittariaqarpugut, SFG-mi siulittaasoq erseqqissaavoq.
Qanimut suleqatigiinneq
Iluatsittumik akuersissutinik allagartaleqqinneqarnerat Aalisarnermut Piniarnermut Nunalerinermullu Naalakkersuisoqarfiup, Kalaallit Nunaanni Aalisarsinnaanermut Nakkutilliisoqarfiup,
Pinngortitaleriffiup peqatigiiffiullu Sustainable Fisheries Greenlandip (SFG) qanimut suleqatigiinnerisigut pisimasoq, tusagassiuutinut nalunaarummi allassimavoq.