MSC nipisattassiissutinik qaffaanermik misissuisoq

Naalakkersuisut maajip aqqaneq-aappaanni nipisannut TAC 204 tonsinik qaffappaat, Nuuk Maniitsorlu immikkut tamarmik 104 tonsinik qaffaaffigineqarlutik. Tamanna pisimavoq, tusarniaanermi akissuterpassuit, ingerlatsinissamut pilersaarut naapertorlugu qaffaasoqarnissaanik akerliusimagaluartut.

Qaffaasoqarnera politikkerinik aalisarnermillu inuussutissarsiuteqartunik aalassatsitsisimavoq, MSC-mimmi allagartalerneqarnerup malitsigisanik niuerfissat amerlanerusarmata aamma nipisaat suaasa akii qaffasinnerusarmata.

Polar Srafoodip siulersuisuini siulittaasup Henrik Lethip naatsorsuutigaa, MSC-mik allagartalerneqaqqinngikkaanni, tunisinermi kiilumut akigitinneqartartoq 15 koruuninik annikinnerulissasoq.

Sustainable Fisheries Greenlandimit (SFG) Sermitsiaq.AG-mut ilisimatitsissutigineqarpoq, MSC-p qaffaasimaneq misissorlugu aallartissimagaa.

- Taakku isumaqarpata, pisassiissutinik qaffaasimaneq MSC-mik allagartalerneqarsimanermut malunnaatilimmik allanngortoqartoq, taava aalisarnissamut piffissaliussap avataani aalisartarsimasutut, MSC-mik allagartaligaasimaneq nalilersoqqinneqartariaqassaaq, Rasmus Hedehold SFG-p allattoqarfianeersoq nassuiaavoq.

Immikkut ittumik misissuisoqartoq

Nipisanniarnissamut maanna allagartarineqartoq 2021-mi februaarip qaammataata tungaanut atuuppoq. Tamatuma kingorna nutaamik allagartaliisoqassaaq. Nutaamik allagartaliiniarluni suliaq ingerlavoq, inaarutaasumillu nalunaarusiaq 2020-mi oktoberip/novemberip qaammataanni saqqummiunneqassalluni.

Nalunaarusiamut pineqartumut atatillugu paasissutissat 2020-mi pisassiissutinik suli qaffaasoqanngitsoq katersorneqarsimapput, taamaammat pisimasoq nalunaarusiamut ilanngunneqarsimanngilaq. Maajilli qaammataani qaffaasoqarsimanera pissutigalugu immikkut ittumik misissuineq aallartinneqarsimavoq.

- Tamanna qanoq kinguneqassanersoq, qaammatip ataatsip missaa qaangiuppat paasinarsiumaarpoq. Paasissutissat assigiinngitsut allagartaliisarfimmit (DNV) kingusinnerusukkut nalilersorneqartussat katersuleruttorpavut, Rasmus Hedeholm oqarpoq.

Inaarutaasumik suli aalajangiiffigineqanngitsoq

Taassuma erseqqissaatigaa, pisassiissutinik qaffaasoqarsimammat imaanngitsoq nipisanniarnermi MSC-mik allagaqartaqarnermik annaasaqartoqassasoq.

- Nalilersuisoqaqqinnerani imaluunniit 2021-mi nalinginnaasumik nalilersuisoqarnerani, pisassiissutinik qaffaasimaneq aalisagaqassutsimut sunniuteqarsimanersoq nalunaarutigissavarput. Suliassaq pineqartoq SFG-p Pinngortitaleriffik suleqatigalugu suliarileruttorpaa, taanna oqarpoq.

Naalakkersuisut suliaq tamanut saqqummiunneqarmat ilisimatitsissutigisimavaat, ukiup siuliani pisarinngitsuukkat nuunneqarsimasut, ingerlatsinissamulli pilersaarut naapertorlugu nuussisinnaaneq ajornarpoq.

Taamaammat SFG-p MSC-mut oqartussanut uppernarsassavaa, MSC-mik allagartalerneqarsimaneq atuutiinnassappat, pisassiissutinik qaffaasimaneq nipisaqassutsimut ajoqusiisimanngitsoq.