Modernamit akiuussutissaq Kalaallit Nunaata isumaqatiginninniutigaa
Danmark Modernamit coronavirusimut akiuussutissanik pissarsinissamut isumaqatigiissuteqareeraluartoq, taamaattoq akiuussutissat Modernameersut qaqugu Kalaallit Nunaannut oqqunneqassanersut suli nalorninartoqarpoq.
Danmark Modernamiit coronamut akiuussutissanik pissarsinissaminut isumaqatigiissuteqaqqammerpoq, sapaatit akunnerinilu tullerni akiuussutissamik tikittoornissani naatsorsuutigisinnaallugu.
Akiuussutissalli Danmarkimut nassiunneqartussat amerlanngimmata, Kalaallit Nunaat qaqugu pissarsissanersoq nalunarallarpoq.
- Kalaallit Nunaat maannakkorpiaq Danmarkimut oqaloqateqarpoq Modernamiit akiuussutissat pillugit. Kalaaallit Nunaalli qaqugorpiaq nassiussarsissanersoq nalunarpoq, nunatta nakorsaanera Henrik L. Hansen Sermitsiaq.AG-mut ilisimatitsivoq.
Coronavirusimut akiuussutissamik Pfizer/BioNTechimeersumit kapitissimasut Nuummi 903-iupput, Ilulissanilu 402-jullutik. Pfizerimiit akiuussutissat tullii nunatsinnut sapaatip akunnerani matumani tikinnissaat naatsorsuutigineqarpoq.
- Pfizerimiit tigusassagut tikisinneqangajalersut, Modernamiit akiuussutissanik taarsertikkusussinnaagaluarpagut. Akiuussutissat Modernameersut passukkuminarnerupput, taamaattumillu nunatsinni innuttaasunik akiuussutissalersuinermut atoruminarnerullutik, Henrik L. Hansen ilisimatitsivoq.
Tikittoorutissat siulliit nalorninarput
Statens Serum Institutip nittartagaani Modernamiit coronavirusimut akiuussutissat tikittussat allattorsimasuutigineqarput. Danmark sapaatip akunnerani matumani akiuussutissanik 5.000-inik Modernameersunik pissarsissaaq. Sapaatit akunnerillu marluk qaangiuppata taamatulli 6.000-inik pissarsissalluni. Sanilliutissagaanni Pfizerimeersut akiuussutissat 58.500-t Danmarkimit sapaatip akunnerani matumani pissarsiarineqassapput.
Akiuussutissat taama ikitsiginerat pissutigalugu Modernameersut nunatsinni qaqugu atugaalernissaat nalorninarallarpoq.
Peqqissutsimut Naalakkersuisoq tusagassiorfinnut nalunaaruteqarluni ilisimatitsivoq Danmarkimi Peqqissutsimut Utoqqarnullu ministeri attaveqarfigisimagini, akiuussutissaq Modernameersoq pillugu. Akiuussutissaq taanna atorlugu pingaartumik Avannaani Tunumilu akiuussutissalersuinissaq ingerlanneqarsinnaaneruvoq.
- Nunami immikkoortuni taakkunani inunnik tamanik tamakkiisumik akiuussutissamik kapisinerup, naalagaaffimmi sumiiffinni tamani Covid-19-ip nappaalanermut aarlerinaataanik akiuiniarluta suliniuteqarnitsinnik annertuumik nukittorsaassaaq, Anna Wangenheim tusagassiorfinnut nalunaaruteqarluni oqarpoq.