Mobilikkut internet attaviluppoq

Taxani dankort atorlugu akiliissutit attavilullattaapput. Tamanna pissuteqarpoq Tele-Postimi serverit arlaata ajoquteqarneranik teknikerillu tamanna iluarsiniarlugu sulipput. Mobilinik 2G aamma 3G atorlugu internetterneq aamma attaviloqattaarpoq.

Angallattakkatigut interneti 20. maj aallarnerfigalugu akornuteqaqattaalerpoq. Teknikerit Nokia Solutions and Networks –imeersut serveri angallattanik interneternermut atortoq arlaleriarlutik piginnaanngorsarlugu iluarseriaraluarpaat. Unnuaq serveri piginnaanngorsarniarlugu misileqqikkaluarpaat, minutsili kingullerpaaq iluatsinngitsoorpoq

- Teknikerit Finland-imiut Kalaallit Nunaanni nalunaaquttap unnuaanerani, akornutaasoq nassaariniaraluarpaat, piffissarititaasulli iluani iluatsinngitsoorlugu. Taamaammat maanna piginnaanngorsaaniarnermi suna akornutaanersoq paasiniarlugu sulivugut, Kristine Bertelsen, TELE-POST-imi mobile team-imi aqutsisuusoq nassuiaavoq.

2G- mut, 3G-mullu attaveqaatinik ajornartorsiuteqarneq annermik taxa-nik angallassisunik eqquivoq, kiisalu mobiltelefonitik atorlugit internetertartunik.

TELE-POST-ip akornutaasoq nassaariniarsaraa, pilersaarutillu malillugit serveri unnuami sisamanngornerup tallimanngornerullu akornani piginnaanngorsaqqeriassallugu. Tamanna pitinnagu ajornartorsiortoqalissappat telep kaammattuutigaa angallatttakkatigut internetimut attavik qameriarlugu ikeqqeqqullugu.