telefon internettilu
Mobil-Palle: Unammillerneq ammaanneqarli
Nalunaarasuartaateqarnermi akit malunnartumik appassagaluarput politikerit nalunaarasuartaateqarneq ammanerulersittuuppassuk, Palle Christiansen, ´Mobili´-mik piginnittoq, oqarpoq
Naalakkersuisut nalunaarasuartaateqarneq ammanerulersittuuppassuk mobilinik selskabi ´Mobili´ Tele-Postimut unammillernissaminut piareersimavoq.
Taamatut neriorsuivoq mobilselskabimik piginnittoq, naalakkersuisunut Inatsisartunullu ilaasortaasimasoq Palle Christiansen.
Tamanna peqatigalugu taassuma politikerit kajumissaarpaat nalunaarasuartaateqarneq ammanerulerseqqullugu.
Akit appassagaluarput
Taanna oqarpoq kaaviiaartitat amerlanerulissasut atuisartullu amerlanerulissasut, aammalu akit appasinnerulissasut, nalunaarasuartaatinillu atuineq annertunerulissalluni.
– Nalunaarasuartaateqarnermi unammillerneq tamakkiisumik sunniuteqassappat politikerit alloriaqqittariaqarput Tele-Postillu attaveqaatinik ingerlatsinerani unammillerneqalersillugu, aatsaat taamaasippat aningaasartuutit pissusissavimminnut appassapput, taanna tusagassiorfinnut nalunaarutikkut allappoq.
Innuttaasut akilersuipput
Tamanna peqatigalugu tikkuarpaa Tele-Post ingerlatsinermik pitsanngorsaanissaminut pinngitsaalineqassaasoq, taamaasillunilu nettimi unammillerfiusumi ingerlatsinermi aningaasartuutit appariangaatsiassapput, nalunaarasuartaateqarneq ammanerulersinneqartuuppat.
– Politikerit unammillernermik ammaanissaata utaqqinerani atuisartut ullut tamaasa akiligassat akisuut akilertarpaat, Palle Christiansen erseqqissaavoq.