Mjølnerparkenimi biilimik qaartoqarneqarneranik politiit misissuipput
Danmarkimi unnuap qeqqata qaangilaaraa Mjølnerparkenip eqqaani biili qaarsimasoq Københavnimi Politiit nalunaarfigineqarput.
Københavnimi Politiit sapaatip unnuaani biili Hothers Pladsimi Nørrebromi Mjølnerparkenip eqqaani qaarsimasoq nalunaarfigineqarput.
Michael Andersen Københavnimi Politiini pigaartut pisortaat, sapaammi ullaakkut taama ilisimatitsivoq.
- Suli oqaaseqarpallaarsinnaanngikkallarpugut, pigaartut pisortaat oqarpoq.
- Kisianni biili qaartinneqarsimasoq uppernarsarsinnaavara. Qanoq pisoqarsimanersoq, aamma suna biilimiissimanersoq suli ilisimanngilarput.
Politiit sapaammi Danmarkimi nalunaaqutaq malillugu 00.57 qaartoqarneranik nalunaarfigineqarput, Michael Andersen ilisimatitsivoq.
Qaartoqarnerani inunnik ajoqusertoqanngilaq.
Sapaammi ullaakkut politiit suli Hothers Pladsimiipput. Kisianni assiaqusersuinerit angallannermut ajoqusiissanngillat, politiit nalunaarput.
- Maannakkorpiaq allanik suliami paasissutissaateqanngilagut. Suliaq misissuiffigillualeruttorparput, Michael Andersen oqarpoq.
Ekstra Bladetip biilimik piginnittoq, angut 53-inik ukiulik oqaloqatigisimavaat. Nuliani ukiunik arfineq-marlunnik inuusunnerusoq peqatigalugu asaasutut suliffeqarfiuteqarput.
- Susoqarnersoq naluarput. Isumassaqartinngivipparput. Nuliara tupaqqasorujussuuvoq. Taanna ullaaq manna suliartortussaagaluarpoq, kisianni taamaaliorsinnaanngilaq, tassami biileqanngilagut, angut Osman Durmaz oqarpoq.
Taanna nulianilu inissiartik Brønshøjimiittoq iluarsattuunneqarnerani utaqqiisaasumik anaanamini Mjølnerparkenimi utaqqiissaasumik najugaqarput, ekstrabladet.dk taama allaaserisaqarpoq.
/ritzau/