Mittarfiup miffigineqarsinnaanera ernumaammernartumik appasissoq
Ullut unnuallu 18-it. Taakkua tassaapput Nuummi mittarfissap silarlunnerata kinguneranik ukiumut qasseriarluni matoqqasariaqartarnissaatut ilimagineqartut.Tamanna eqqarsariaammernartumik qaffasippoq, Folketingimut ilaasortaq Søren Espersen, mittarfissat miffigineqarsinnaanerinut tunngasunik apeqquteqarsimasoq, oqarpoq.
Nuummi Ilulissanilu mittarfissat Kangerlussuarmisut qaffasissusilimmik miffigineqarsinnaassuseqarlutik timmisartuussivigineqarsinnaanavianngillat.
Aviisi Sermitsiaq taama allappoq.
Nuummi silamik pissuteqartumik ammasarnissaq 95 procentiusussatut nalilerneqarpoq, Ilulissanilu 98 procentiusussatut nalilerneqarluni. Tamanna ukiup ingerlanerani ullut unnuallu amerlassusaannut mittarfiup sullissisinnaanngiffigisaanut naatsorsorneqarpat Nuummut ullut unnuallu 18,25-ussapput Ilulissanullu ullut unnuallu 7,3-ussallutik. Pingaartumik Nuummut atatillugu kisitsit Kangerlussuarmit malunnaateqartumik qaffasinneruvoq, Kangerlussuarmi silamik pissuteqartumik ammasarfik 99-99,5 procentiummat, tamatumalu mittarfiup silamik pissuteqartumik ukiumut ullut unnuallu 2,7-ini matoqqasarnera taamaaqatigalugu.
Tamanna assartuussinermut ministereqarfimmit akissummi atuarneqarsinnaavoq, taannalu paasissutissanit Kalaallit Airportsimit aamma Ineqarnermut Attaveqaqatigiinnermullu Naalakkersuisoqarfimmit aallersimavoq.
Kangerlussuaq matuneqarpat ajorluinnartuussasoq
Dansk Folkeparti sinnerlugu Folketingimi ilaasortaq, Søren Espersen, mittarfissat miffigineqarsinnaassusaasa qaffasissusaannik Danmarkimi assartuussinermut ministerimut apeqquteqaateqarsimavoq, taassumalu timmisartumik aallarniarnermi minniarnermilu ullorpassuit ajornartorsiuteqarfiusussaanerat ernummatigaa.
– Isumaqarpunga pingaartumik Nuummut kisitsit qaffasissorujussuusoq. Tamatumani qaavatigut apeqqutigineqarsinnaavoq, timmisartut taava sumut ingerlasussanngortinneqartassanersut? Ilaasorpassuillu utaqqinemrinni sumiittassappat? Tassuuna aamma uppernarsarneqarpoq Kangerlussuaq matuneqassagaluarpat ajorluinnartuussasoq, timmisartummi Nuummit Nuummullu ingerlasut aqqutaani silarlulissagaluarput sumunnartassappat? Kangerlussuaq Kalaallit Nunaannut aallaaviujuaannarsimavoq. Tassani utaqqineq qularnanngitsumik kipiluttunartuuvoq, kisianni inunnit tamanna akuerineqarsimavoq, Sermitsiamut oqarpoq.
Søren Espersen naapertorlugu ullut unnuallu 18-it timmisartuussivigineqarsinnaanngitsutut ilimagineqartut immaqa allaat appasinaarneqarsimapput.
Allaaserisaq tamakkerlugu aviisimi Sermitsiami atuarsinnaavat. Aviisi uani ataani pissarsiarisinnaavat: