Mittarfiup inissisimanera allanngortinneqarnavianngilaq
Nuup kujataani aaqqiissuteqarnissaq USA-lu oqaloqatigiinnermi oqaluuserisassanut ilaanngilaq, Naalakkersuisut naqissusiipput.
Nuummi mittarfiup kujasinnerusumut inissinneqarnissaa aalajangiunneqanngilaq – aamma USA aningaasaliigaluarpat.
Tillie Martinussenip (Sul) paragraf 37 naapertorlugu apeqquteqaataanut akissummi Naalakkersuisut taama naqissusiipput.
Amerikamiut mittarfinnut aningaasaleeqataanissamut soqutiginninnerat atorluarlugu Nuup kujataani 3.000 meterimik mittarfimmik pilersitsinermut atorneqarsinnaasoq, Suleqatigiissitsisunit Inatsisartunut ilaasortap siornatigut tunngavilersuutiginikuuaa.
Kisianni tamanna periarfissaatinneqanngilaq.
- NATO, USA allalluunniit Nuummi mittarfimmut allamut aningaasaleeqataarusunnissaannut Naalakkersuisut takussutissaqanngillaq, attaveqaqatigiinnermut naalakkersuisoq Karl Frederik Danielsen (S), nunanut allanut naalakkersuisup, Ane Lone Baggerip (S), akissutaa naapertorlugu taama akissuteqarpoq.
Kalaallit Nunaanni mittarfinnut aningaasaliinissamut periarfissat misissorneqarnissaat, amerikamiut illersornissamut ministeriata tullersortaata John Roodip siorna septembarip 16-anni nalunaarutigaa.
Taamatut aningaasaleeratartoqarsinnaanera maanna mittarfiliortiternissamut inatsisissap akuerineqartoq tunngavigalugu pissaaq, Karl Frederik Danielsen (S) akissummini naqissusiivoq.
- Kalaallit Nunaata, Danmarkip USA-llu Permanent Committeemut sinaakkutissat iluanni amerikamiut Kalaallit Nunaanni attaveqaatinut aningaasaliisinnaanerat oqallisigissavaat. Suliami akuusut siunissami Kalaallit Nunaanni ataatsimoortumik suliniuteqarnissamut periarfissat aalajangersimasut ataatsimut iluaqutaasussat misissuiffigissavaat. Tamatumunnga atatillugu Naalakkersuisuniit, Nuummi aamma Ilulissani nunani tamalaani mittarfiit kiisalu Qaqortumi nunap immikkoortuani mittarfiup sananeqarnissaannut, ingerlanneqarnissaannut aningaasalersorneqarnissaannullu killiliussatut piumasaqaatit pillugit Inatsisartut inatsisaat nr. 4, 22. november 2018-imeersoq innersuussutigineqarpoq.
- Naalakkersuisut maannarpiaq USA-mik, NATO-mik peqatigiinnilluunniit allanik mittarfinnut allanut aningaasalersuinissamut eqqarsaatersuutit pillugit oqaloqatigiinnernik ingerlataqanngilaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...