Mittarfittaassaq: Qaartartut 3.200 tonsit atorlugit qaqqarsuaq qaartinneqassaaq
Nuummi mittarfiup tallissutissaanut atatillugu qaqqamik qaartiteraluni qaartartunik atuinissaq annertoorujussuuvoq. Qaqqarli qanoq annertutigisoq piiarneqassanersoq pillugu isumaqatigiinngittoqarpoq.
Mittarfittaassaq pillugu ASN-imut nalunaarusiaq innuttaasunit marlunngornermi unnukkut ataatsimiissutigineqarmat, paasinarsivoq qaqqaq qanoq annertutiginersoq piiarneqarnissaa pillugu isumaqatigiinngittoqartoq.
Hans Kristian Drejer,Niras-imeersoq, Kalaallit Airportsimut ASN-imik nalunaarusiortuuvoq. Taassuma oqarnera naapertorlugu qaqqaq katillugu 5,4 milliuunit kubikmiiteri qaartiterlugu piiarneqassaaq.
Avatangiisinut naalakkersuisoqarfimmi kisitsisit allat
Avatangiisinut naalakkersuisoqarfiup qaammatip ataatsip matuma missaata siorna, Sermitsiaq.AG-mut ilisimatitsissutigaa qaqqaq 6,4 milliuunit kubikmiiterisut annertussusilik, tassa 20 procentit missaannik annerusoq, piiarneqassasoq.
Eqquilluannginneq innuttaasumit tupigusuutigineqartoq.
Avatangiisinut naalakkersuisoqarfimmi pisortaq Mette Skarregaard Pedersen Sermitsiaq.AG-mut ilisimatitsivoq, naalakkersuisoqarfiup siornatigut oqariartuutigisimasaa ASN-imi nalunaarusiami immikkoortoq 3.3.-mut tunngavoq, tassani qaqqap qaartinneqartup annertussusaa oqaatigineqarpoq.
Innuttaasunik ataatsimiititsineq tunuliaqutaralugu naalakkersuisoqarfik sanaartornermik suliaqartumut attaveqarpoq, takussutissaq 3.3 aamma nunap atanngitsup assanneqarneranik ilaqartoq taassuma nassuiarpaa.
- Tamanna tunuliaqutigalugu sanaartugassanik suliarinnittoq, ASN-imi nalunaarusiamik tassanerpiaq ilanngussisoqassasoq, taamaalilluni suup qaartinneqarnissaa ersarissumik atuarneqarsinnaassalluni, aamma suna assanneqassanersoq, Mette Skarregaard Pedersen ilisimatitsivoq.
Unali qularnaatsuuvoq: annertoorujussuaq peertussaavoq, tamannalu innuttaasunit isummissutigiuminaappoq.
Mittarfilioqatigiiffimmi suliamut pisortap, Aviaaja Karlshøj Knudsenip naqissuserpaa annertussuseq 5,4 milliuunit kubikmiiteri kisitsi eqqortuusoq, sulialli ingerlanneqarnerani allanngortoqarsinnaanera nassuiaatigalugu.
Qaqqaq 5,4 milliuunit kubikmiiteri qanoq annertutigiva?
Aviaaja Karlshøj Knudsenip paasiuminarsarluinnarlugu ima nassuiarpaa.
- Annertussusaa assigiinnarpaa arsaattarfik, kilumiiterip aappaa avillugu portussuseqartoq!
Dynamit-Harrymut piukkunnarluinnartoq
Nuummi mittarfiup tallilerneqarnissaanut qaqqaq piiarneqartussaq annertungaatsiarpoq. Qaqqarli qanoq annertutiginersoq piiarneqassanersoq isumaqatiginngissutigineqarpoq.
Suliaq naammassisinnaajumallugu suliaqartoq qaartartuuteqangaatsiartariaqassaaq, taamaassappat Olsen-Bandenip filmiliaani Dynamit-Harry (Preben Kaas, aaqq.) pinngitsoorani usorussaaq.
Innuttaasunimmi ataatsimiisitsinermi paasinarsivoq qaartartut dynamit-it katillugit 3.200 tonsit aamma qaartartut allat katillugit 380 tonsit atorneqassasut.
Qaartartut taama amerlatigisut mingutsitsilersinnaasut aarleqqutigineqarput, kvælstoffeqarmata.
Qaqqaq qaartiterlugu piiarneqartussaq pillugu Avatangiisinut naalakkersuisoqarfik oqaaseqartinneqarsinnaasimanngilaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...