Mittarfissuassap inissinneqarnera pillugu akerliussutsimik takutitsisoqalersoq
Nuummi mittarfiup tallilerneqarnissaa pinngitsoortinniarlugu innuttaasut eqimattat suliniuteqarput, siunnersuutigalugulu illoqarfiup kujataani mittarfimmik pilersitsisoqassasoq.
Eqimattaq Angisunnguaq innuttaasunit tapersersortissarsiorpoq, tallimanngorpallu nalunaaqutaq sisamanut Nuummi illoqarfiup qeqqani Amisuniit Inatsisartut allaffiata tungaanut akerliussutsimik takutitsissalluni. Oqariartuut ersarippoq:
- Illoqarfiup qeqqani angisuumik nutaamik mittarfittaarusunngilagut.
Eqimattami Angisunnguami oqaaseqartartoq, Christian Jeremiassen ilisimatitsivoq, taakku kissaatigaat mittarfissuaqalernissaq, taannali illoqarfiup qeqqani inissisimassanngilaq illoqarfillu marlunngorlugu avillugu.
Naalakkersuisut ilisimatitsereerput mittarfiup inissisimanerata allamut nuunnissaa pisinnaanngitsoq, mittarfissuaatileqatigiiffiullu sanaartortunut piukkunnareersunut suliassamut paasissutissat ullut 14-it matuma siorna nassiutereerpai.
Siunissamik qulakkeerinnittoq
– Nutaamik mittarfissuartaarusuppugut siunissamut qulakkiikkamik, siunissamilu timmisartorsuarnit, mittarfinnik takinerusunik atorfissaqartitsisunit atorneqarsinnaasumik. Taamaattumik inassutigaarput mittarfik Nuup kujataani Angisunnguami, allineqarnissaanut inissalimmi sananeqassasoq, oqaaseqartartoq tusagassiutinut nalunaarummini allappoq.
Ilanngullugu ilisimatitsivoq, eqimattap kissaatiginngikkaa nutaamik mittarfittaarusunngitsoq immikkut akuersissutinik tunngavilimmik, aammalu silaannaap aalaruluttarnera pissutigalugu timmisartut pilersaarutit malillugit tikittarnerannik aallartarnerannillu nalorninartulimmik.
- Tupigusuutigaarput taamaallaat »allaffimmi pilersaarusiortartut« kisimik manna tikillugu inissisimaffissaa, politikkikkut aalajangerneqarsimasoq, inassutigisimammassuk akerlilissallugu kimilluunniit ersigineqartoq, aammalu timmisartuussinermik ilisimannittunit, soorlu timmisartortartunit, timmisartut ingerlaarnerannik nakkutilliisunit allanillu, inassutigineqarsimanngitsumik, isornartorsiuinermi ilaatigut allanneqarpoq.
Kujataani inissisimaffik
Eqimattap Nuup kujataatungaani inissiinissaq pitsaanerusutut isigaat, illoqarfimmi Siorarsiorfiup tungaanut alliartortinneqarmat. Mittarfeqarfiullu maanna atuuttup Angigunnguup tungaanut sulluliassat ikaartarfiillu aningaasalersorluarsinnaammagit.
Oqaaseqartartup ilanngullugu erseqqissaatigaa akerliussutsimik takutitsinermi buuh-mik suaartarnerit akuerineqassanngitsut, pisussaq ilaqutariit peqataaffigisussaammassuk, inersimasullu inuusuttunut maligassiuillutik takutitsisussaammata.
Eqimattap Nuummi innuttaasut kaammattorpai oqallinnermi peqataaqqullugit Facebookimi quppernermi uani: Nuup mittarfiata tallinissaa - Nuuks lufthavnsudvidelsesplaner.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...