Mittarfissualiorneq malittarisassat nutaat malillugit aallarteqqinneqassaaq

Nuummi mittarfissualiornermiit sulisoqarpalaaq marlunngornermi tusaaneqaqqissinnaalissapput. Mittarfissualiornermi sulisut najugaqarfeqatigiinni ineqartuusut taassumalu avataani ineqartuusut aalajangersimasunik malitassaqarlutik sulisinnaanngorput.

Nuummi mittarfissualiorfiusoq Nuummi coronavirusimik tunillaassuuttoqaleratarsinnaanera pillugu mattusimaffiugallarpoq. Suliffeqarfimmi sulisut arlallit sapaatit akunneri kingulliit tunillatsissimareerput.

Nuummili mittarfissualiorneq ullumi marlunngornermi - 8. juni - aallarteqqissinnaanngorpoq, sulisullu aalajangersimasunik malitassinneqarput.

2 miiterinik ungasissuseqartarnissaq, eqqiluisaarneq "boble"-niinnerillu atuutsinneqassapput, Nuummi mittarfissap coronavirusimik tunillaassuuffiunnginnissaa pillugu.

Nappaalanersuaqarneranut Ataatsimiititaliarsuup nalunaarut nutaaq, sumiiffimmi sulisoqarnerani tunillaassuuttoqannginnissaanik siunertalik atuutsileqqammerpaa.

Sulisut mittarfissualiorfimmi najugaqarfimmiittut mattusimaffiup iluani namminneerlutik suliaqarsinnaapput arlaannaannulluunniit 2 miiteri ataallugu qanillissanngikkunik, ilisimatitsissutigineqarpoq.

"Boble" atuutsilerneqarpoq

Sulisut najugaqarfiup avataani sulisuusut sulinerup avataatigut angerlarsimaannaqqusaalerput. Suliffeqarfiullu iluani "boble"-mik taallugu eqimattakkaartussanik atuutsitsisoqalissaaq, sulisut najugaqarfimmiittut najugaqarfiullu avataaniittut ataatsimuulinnginnissaat pillugu:

- Sulisut najugaqarfiup avataani najugaqartuusut mattusimaffiup iluani suliaqarsinnaapput "boble"-miissinnaagunik, tassa mattusimaffiup avataanut pigaangamik angerlarsimaannartussanngortassagunik. Tassa imaappoq kisimiillutik najugaqassapput, imaluunniit allat "boble"-miittut najugaqatigalugit, nalunaarusiami erseqqissarneqarpoq.

Sulisut najugaqarfiup avataani ineqartut sapaatip akunneranut ataasiarlutik misissortittassapput. Suliffeqarfiup mattusimaneqarnera 17. junip tungaanut atuutsinneqarpoq, sivitsorneqarsinnaassallunili.

Angalasunut malittarisassat amerlanerit

Nutaatut ilanngunneqarpoq sulisut nunarput qimallugu aallartussat misissorteqqaartarnissaat.

- Inuit najugaqarfimmi mattusimaffiusumi najugaqarsimasut sulisimasulluunniit nunatsinnit aallannginnerminnit misissorteqqaartassapput. Misissortereernerup kingorna mattusimaffimmukaqqissanngillat aallarnissalli tungaanut allami angerlarsimaannartussanngussallutik.

Aallannginnermi misissortinnerup inernera akunnerit 48-nit nutaannginnerussanngilaq.

Sulisussat Nuummut tikittut angerlarsimaannaqqaartassapput, suliffeqarfiullu isumagissavaa tikerlaat sulisunut akulerutinnginnissaat.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS