Mittarfiliortiternissap nuna namminiilivinnissamut qaninnerulersippaa imaluunniit ungasinnerulersippaa? Apeqqutit tamakku illuatungiliuttut amerlanerussuteqartullu avissaartuutigisaasa ilagaat.

Siumup oqaaseqartartua qularuteqanngilaq.

- Taakku aningaasaliinerit ineriartortitsinermik aamma isertitanik pilersitsinissamut pisariaqarput, Karl-Kristian Kruse oqarpoq.

- Nammineernerulissagutta taakku aningaasaliinerit pingaaruteqarput.

Demokraatit siulittaasuat aamma taama oqariartuuteqarpoq.

- Maanna politikkikkut suliniutitta annersaraat politikkikkut namminersulivinnissaq, taanna oqarpoq.

- Tamannat anguniagaq naammassissagutsigu inuiaqatigiittut tunngavipput pitsanngortariaqarlugu ilisimavarput. Assersuutigalugu isumaginninneq, atuarfeqarneq aamma ilinniartitaaneq kiisalu aningaasaqarneq.

- Mittarliortiternitsigut pingaaruteqarluinnartumik eqqortumik alloriassalluta Demokraatini isumaqarluinnarpugut. Mittarfiit nutaat pilersinnerisigut inuussutissarsiornikkut ineriartortitsinissamut tunngavimmik pilersitsissaagut, kiisalu inuiaqatigiinnut tamanut aningaasaqarnikkut ineriartortitsilluta.

Illuatungiliuttut akerlerluinnaanik isumaqarput.

- Nunarput danskit naalagaaffiannut tunilerparput, Hans Enoksen (PN) Karl-Kristian Krusemut (S) oqaaseqarnermini oqarpoq.

- Naalagaaffik itigartitsisinnaatitaanermigut aalajangiisumik sunniuteqartussaavoq.

Oqaaseqaat Siumumi oqaaseqartartup sakkortuumik qisuariarfigaa.

- Nunarput tuninngilarput. Eqqortumik oqaluuserinnittoqarnissaa sakkortuumik kajumissaarutigaara, Karl-Kristian Kruse taama akissuteqarpoq.

Danmarkip piginneqataanissaanik isumaqatigiissuteqarnikkut namminiilivinnissamut ingerlasoqarunnaartoq, Inuit Ataqatigiit aamma isumaqarput.

- Danskit naalagaaffiata aningaasaliinissaa tikilluaqqullugulu peqataaffigerusupparput. Danskit aningaasaliinerat kalaallit inuiaqatigiit suliffeqarfiutaannut killilersuineranik kiisalu Nunatsinni namminersornitsinnut kinguneqannginnissaa, uagut pingaarnertut kissaatigaarput, partiip oqaaseqartartua Aqqaluaq B. Egede oqarpoq.