Mittarfissat nutaat: Check-inimut aamma nassatanik passussinermut atortussat pillugit isumaqatigiittoqartoq
Kalaallit Airports Canadami Embross, Nuummi, Ilulissani Qaqortumilu mittarfissani atortussat pillugit isumaqatigiissuteqarfigaa.
Kalaallit Airports (KAIR) Canadami Embross, check-in-ini, imminut sullilluni nassatanik tunniussinernut aamma imminut sullinnissamut kioskinik pilersuinissaq pillugu isumaqatigiissuteqarfigalugu atsioqatigeqqammerpaa.
Embross angalanermut uppernarsaatit security-mi misissorneqarnissaannut eGates-inut atortunik aamma mittarfissanut suliaqartussaaq. Atortussat suliarineranut, nunatsinnut assartorneranut ikkussorneranullu canadamiut suliffeqarfiat KAIR-imut isumaqatigiissuteqarpoq.
KAIR tusagassiorfinnut taama nalunaaruteqarpoq.
Kalaallit Airportsimi suliniutinut pisortaq Aviaaja Karlshøj Knudsen isumaqatigiissut pillugu nuannaarpoq:
- Qaffasissunik pitsaassusilinnik nutaaliaanerpaanik atortoqalissaagut, mittarfinni sullitat aqqusaagassaannik pitsaanerulersitsisussanik, sukkanerulersitsisussanik sunniuteqarluarnerulersitsisussanillu. Embross suleqatissaavoq nukittooq suliassaqarfiup taassumarpiaap iluani sivisuumik misilittagaqartoq, aammalu suleqatiginissaa qilanaaraarput, oqarpoq.
Nassatanut teknologi nutaanerpaaq
Atortorissaarutit nutaat atorlugit nunat tamalaani mittarfissuarni annerusuni check-in aamma nassatanik tunniussineq assigalugu nunatsinni sullissineq eqaannerulissasoq, KAIR ilisimatitsivoq. Mittarfinni Arlandami aamma Københavnimi check-in aamma nassatanik tunniussinermi nammineq sullinneq atortarpoq.
Suliffeqarfiup erseqqissarpaa check-init aamma nassatanik tunniussisarfiit sullissisoqartut suli atorneqartarumaartut.
Nassatat allagartaanni RFID-teknologi atorlugu nalunaarsuineq aamma atulissaaq.
- Teknologii nassatat tunniunneqartut ingerlaannartumik ilisarinissaannut periaasiuvoq, aammalu nassatanik passussisarneq ullumikkornit sunniuteqarnerulersittussaallugu, KAIR allappoq.
Ingerlalluarnissamik neriorsuisoq
Embrossimi tuniniaanermut pisortaq Frank Mikkelsen oqarpoq suliffeqarfiup suliariumannittussarsiuussinermik ajugaasimanera nuannerluinnartoq, sullitanullu iluaqutaalluartunik atortunik isumaginninnissamik neriorsuilluni:
- Atortunik aaqqiissutissanillu isumaqatigiissutip imarisaannik pilersuinermik ikkussuisarnermillu sivisuumik misilittagaqarpugut piginnaasaqarlutalu, aammalu mittarfittaassat ilaasussallu check-in-imi nassatanillu passussinermi assigiissaartumik, sunniuteqarluartumik tutsuiginartumillu misigisaqartinnissaasa qulakkeersinnaanissaa qilanaaraarput, Frank Mikkelsen oqarpoq.
Nuummi Ilulissani mittarfissat pilersaarutit malillugit ukiakkut 2024-imi atulissapput. Qaqortumi mittarfissaq ukiakkut 2025-imi naammassissangatinneqarpoq.