Mittarfissaq pillugu ataatsimiisitsineq: Najukkami sulisussat qassiussappat?
Qaqortumi mittarfissaq pillugu innuttaasunik ataatsimiisitsineq soqutigineqarluarpoq. Kalaallit Airports, Pennecon aamma Kommune Kujalleq mittarfissap sanaartorneqarnissaanut tunngatillugu pilersaarusianik saqqummiussineranni inuit peqataasut hunnorujut missaaniipput.
Mittarfissap isikkussaa filmiliaaraq takutinneqariarluni Kommune Kujalleq, Kalaallit Airports aamma canadami sanaartugassanik suliassinneqartartoq, Pennecon Heacy Civil Qaqortumi mittarfissap sanaartorneqarnissaanut tunngatillugu pingasunngornermi innuttaasunik ataatsimiisitsinermi saqqummiussipput.
Mittarfissaq sanaartorneqarluni aallartinneqarpat, taava sulisut katillugit 50-70 missaaniittut atorfissaqartinneqassapput. Tamanna mittarfissamik suliarinnittussap nassuiaatigaa. Najukkami sulisut 20-30 missaaniittut atorfissaqartinneqassapput, kisitsillu pisariaqartitsineq aallaavigalugu annikillisinnaavoq annertusineqarsinnaalluniluunniit.
Naja Kriegel innuttaasunik ataatsimiisitsinermi peqataavoq, taassumallu ilaatigut paaserusussimavaa najukkami sulisut mittarfissap sanaartorneqarnerani sulisinneqassanersut.
- Isumaqarama najukkami sulisussat amerlanerpaat atorfinitsinneqarnissaat pingaaruteqartoq, taamaammat taama aperivunga. Inuusuttut amerlasuut suliffissaaleqipput, mittarfissamillu sanaartorneq taakkununnga periarfissaalluarsinnaavoq, Naja Kriegel oqarpoq.
Sanaartorneq aallartippat annertuumik ajoqusertoqassappat Qaqortumi peqqinnissaqarfik malinnaasinnaasanersoq taassuma aamma apeqquteqarfigaa. Penneconimiillu akineqarpoq suliffeqarfiup Nunatta Nakorsaanera oqaloqatigisimagaat sanaartornerlu eqqarsaatigalugu peqqinnissaqarfik immikkut isiginiarneqartoq erseqqissaassutigineqarluni.
- Maani Qaqortumi nakorsiarniaraanni utaqqineq ilaanni sivisusinnaasarpoq. Taamaammat taanna aamma apeqqutigineqarnissaa inissaminiisoraara, tassami uagut peqqinnissaqarfimmut saaffiginnittarnerput arlaatigut innarlerneqannginnissaa anguniarneqartariaqarpoq, Naja Kriegel oqarpoq.
Sulisitsisut ataatsimiinissamut qaaqqusivoq
Qaqortumi sulisitsisut mittarfiliornissaq eqqarsaatigalugu isumalluarput, Penneconimut Kalaallit Airportsimullu suleqateqalernissartik nuannaarutigaat.
- Innuttaasunik ataatsimiisitsineq aallavigalugu Kalaallit Airports ataavartumik ataatsimeeqqatigisalernissaat kaammattuutigaarput. Suliaq qitiutinneqartariaqarpoq, taamaasilluta unammilligassat assigiinngitsut aaqqiissuteqarfigisinnaasavagut. Pingaarnerpaavorli mittarfiliortussat inuiaqatigiinut pulasilluarnissaat, Qaqortumi sulisitsisut immikkoortortaqarfiani siulittaasoq, Erik J. Nørskov oqarpoq.
Pennecon taamaallaat ukiuunnginnerani sanaartortassalluni aalajangiussimavaa. Tamannalu innuttaasunit paasiuminaatinneqarpoq, Nuummi Ilulissanilu mittarfissuit ukioq kaajallallugu sanaartorneqarmata. Erik J. Nørskovilli suliffeqarfik arlaatigut aaqqiissuteqarnissaa kujataanilu silap qanoq ittuunera takulerunikku isummatik allanngortissinnaassagaat qularutiginngilaa.
- CSR-politikki iluamik aallukkunikku, taava sulisut qaammatini marlunni suliffeqartinneqartassapput, kisianni maaniilerunik silalu qanoq ittuunersoq takulerunikku taava isummatik imaasinnaasoq aamma allanngortikkaat, Erik J. Nørskov oqarpoq.
Najukkami sulisussat suliffissaat 23-it qinnuteqarfigineqarsinnaaqqammerput, qinnuteqarnermilu Majoriaq ikiuutaasinnaavoq. Sulisut ukiuni pingasuni sulisinneqarnissaat naatsorsuutigineqassasoq Penneconip erseqqissaatigaa suliffillu ukiup ilaanni pisassalluni.