Mittarfinnut isumaqatigiissummit Air Greenland peerneqarsinnaavoq

Demokraatit Air Greenlandimut piginneqatigiissutinut isumaqataannginnerat mittarfinnut pilersaarutip ajalusoornissaanik isumaqanngilaq. Naalakkersuisut Siulittaasoqarfiata "pisiortornissaq isumaqatigiissummut atavinngitsutut" nalilerpaat.

Naalagaaffiup Air Greenlandimut piginneqatigiissutaanik pisinissamut Demokraatit peqataajumanatik nalunaarnerat, Danmarkip Kalaallit Nunaatalu mittarfiit pillugit isumaqatigiissutaannut akornutaanavianngilaq. Naalakkersuisut siulittaasoqarfia taama nalunaaruteqartoqarpoq.

Lars Løkke Rasmussenimi Kim Kielsenilu isumaqatigiissut ataatsimoortoq atsioqatigiissutigigaluaraat, taamaattoq Air Greenlandip piginneqatigiissutaanik pisinissaq isumaqatigiissummi qitiunngilaq.

- Namminersorlutik Oqartussat Air Greenlandip piginneqatigiissutaannik pisissanersut pisissannginnersulluunniit isumaqatigiissummi allassimavoq. Isumaqatigiissummili tamakkiisumik peqataanani, naalakkersuisoqarfimmi pisortaq Søren Hald Møller akissuteqarluni allappoq.

Air Greenlandip pisiarinissaa tunngaviunngilaq

Illuatungeriit Air Greenlandimik piginnittuunerup katitigaanerata allanngortinnissaa siunertarigaat, tassalu Namminersorlutik Oqartussat Air Greenlandimik piginneqataassutsit naalagaaffimmit pisiariniaraat isumaqatigiissummi allassimavoq. Imaanngilarli pisinissaq piviusunngussasoq, Søren Hald Møller allappoq.

- Imaanngilaq Air Greenlandip piginneqatigiissutaanik “pisisoqartariaqartoq” naalagaaffik mittarfiliortiternissanut aningaasaliilluni tapiissappat, imaluunniit inuussutissarsiornerup iluani suleqatigiinneq patajaallisarneqassappat.

- Mittarfiliortiternissamut inuussutissarsiornermilu suleqatigiissutissanut isumaqatigiissuteqarnermi, imaanngilaq Namminersorlutik Oqartussat Air Greenlandip piginneqatigiissutaannik pisinissaat qanilliallattoq imaluunniit ungasilliallattoq. Suliat taakku marluk assigiinngitsuupput immikkut suliarineqartut, ataatsikkulli ingerlanneqartut.

Piginneqatigiissutinik pisiortornissaq pillugu danskit naalakkersuisui Naalakkersuisullu isumaqatigiissappata, taava akuersissutit pillugit ingerlaaseq naliginnaasoq malinneqassaaq.

Akuersineq pisinissamut angernerussanngilaq

Mittarfiliortiternissat pillugit pilersaarutit akuerineqassappata imaanngilaq Air Greenlandimi piginneqatigiissutinik pisiortornissaq akuerineqassasoq. Danmarkip Kalaallit Nunaatalu isumaqatigiissutaat tamakkiisoq inatsisissatut siunnersuummi Naalakkersuisut saqqummiussimasaanni allannguutissatut siunnersuutitut ilassutaagaluarpoq. Inatsilli pineqartoq mittarfiit kisiisa pillugit imaqarpoq.

- Mittarfiliortiternissamut inatsisissatut siunnersuummut Naalakkersuisut inatsisissatut allannguutissatut siunnersuutaat atuarukku takusinnaassavat, tunngaviusumik siunertaasoq tassammat mittarfiliortiternissanut inatsisissatut siunnersuummi (tassa mittarfiit nutaat pillugit) Naalakkersuisut danskillu naalakkersuisuisa isumaqatigiissutaannut Inatsisartut akuersitinnissaat.

Sermitsiaq.ag-p Demokraatit oqaaseqarnerat pillugu Kim Kielsen oqaaseqartikkumallugu ippassaq attafigigaluarpaat.

Powered by Labrador CMS