Mittarfinnut aningaasaliinerit pillugut ataatsimiinneq aamma isumasioqatigiinneq

Lars Løkke Rasmussenip aamma Kim Kielsenip akornanni isumaqatigiissut pillugu Aaja Chemnitz Larsen sukumiinerusumik paasisaqarusuppoq.

IA-p Folketingimut ilaasortaatitaata Aaja Chemnitz Larsenip ministeriuneq Lars Løkke Rasmussen (V) ullumi ataatsimeeqatigissavaa, Danmarkip mittarfiliortitsinissat akuerineqassappata aningaasaliissuteqarluni taarsigassarsititsilluni aamma qularnaveeqqusilluni isumaqatigiissuteqarnera oqaluuseriniarlugu.

- Ministeriunerummi danskit partiit ataatsimeeqatigereerpai, tassanilu pilersaarutit paasissutissiissutigai. Taammaammallu kalaallit Folketingimut ilaasortaatitaasa ataatsimeeqatigineqarnissaat ilungersuutiginikuuara, Aaja Chemnitz Larsen oqarpoq.

Mittarfiliortiternissamut siunnersuut Christiansborgimi pingasunngorpat oqaluuserineqaqqittussaavoq.

Ullormi tassani finansministeri Kristian Jensen (V) nunarput pillugu ataatsimiititaliami isumasioqatigineqarnissamut qaaqquneqarpoq. Enhedslistenimeersup Christian Juhlip isumaqatigiissutip tunuliaqutaa apeqquteqarfigaa ‘’Namminersorlutik Oqartussat attaveqaqatigiinnerup pitsanngoriartinnissaanut periarfissaq sorleq atorniarlugu suli aalajanginnginnera pissutigalugu.’’

Christian Juhlip siornatigut Lars Løkke Rasmussen piffissaanngitsumi isumaqatigiissuteqarnerarlugu isornartorsiornikuuaa.

- Lars Løkke Rasmussenip tungaanit kalaallit politikkikkut ingerlatsinerannut ataqqinnissuseqanngitsumik aamma nunanut allanut politikkimik pitsorluttumik ingerlatseriarnermik pivoq, Christian Juhl (EL) oqarpoq.

Powered by Labrador CMS