Mittarfinnik ingerlatseqatigiiffiup akigititat nutaat kalerriutigai
Mittarfeqarfiit atuisunut akigititani maanna allanngortippai, tamannalu 2013-imili pisimanngilaq.
Mittarfeqarfiit nammineq oqaatiginninnerat naapertorlugu akit pisariinnerullutillu akit nalinginut naleqqussarneqarput, taamaalilluni ingerlatseqatigiiffiup atuisuisa akit takujuminartinnerulissammatigit.
- Malittarisassiat nutaat akigititanut akiliinissamullu periutsitigut pisariillisagaapput, sananeqaammini Nunani Avannarlerni mittarfiit allat malittarisassiaannut naapertuunnerullutik, soorluttaaq suliffeqarfimmik ingerlatsinissamut isertitassanik pisariaqartunik Mittarfeqarfiit pissarsiaqarnissaannut qularnaarissallutik, Mittarfeqarfinni pisortaq Henrik Estrup, tusagassiiutinut nalunaarummi nassuiaavoq.
Akinik kinguleruttoorneq
Akitigut 25 millionit koruunit missaannik kinguleruttoortoqarsimasoq, ingerlatseqatigiiffik ilisimatitsivoq, akigititat 2013-imili allanngortinneqarsimannginnerat pissutigalugu.
Peqqinnissaqarfiup pinasuartumik angallassisarneri ukiumut 300-t missaanniittut akilerneqartalissapput. Timmisartumi inuttat timmisartuussinermik ingerlatsitisut ilaasunut akitsuutinik akiliisinneqanngittuassapput, timmisartumili inuttat allamut suliartortillutik ilaasutut angalasut akitsuuserneqartalissapput.
Isertitaqarfiunerulissanngitsoq
- Akigititanut akiliinissamullu malittarisassiamut nutaamut iluserititamut tunngaviusoq Mittarfeqarfinnut immikkut isertitaqarfiunerulissanngilaq, taamaattorli akigititat 4,9 %-inik iluarsiiviginerat ilanngunneqarluni, ingerlatseqatigiiffiup tusagassiuutinut nalunaarutaani tamanna allaqqavoq.
Akigititat nutaat ukiup nikinnerani atuutilissapput, taakkulu Naalakkersuisunit akuerineqarput.